Búgin Astanada Ult Kóshbasshysy Kitaphanasynda eńbek jáne muǵalimder kúni qarsańynda eńbek áýletterine arnap konsert ótkizildi. Bul týraly Qamshy portaly QazAqparatqa silteme jasaı otyryp habarlaıdy.

Jastarmen kezdesýge elge eleýli otbasylar shaqyrylǵan. Mysaly, Maqanovtar januıasynda 11 adam ustazdyqty óziniń ómirlik kásibi etip tańdaǵan. Eńbek áýletiniń jalpy tájirıbe ótili 350 jylǵa tatıdy.

Baqyt Maqanovtyń aıtýynsha, «eń aldymen óz eńbegine degen adaldyq qana emes, qoǵamǵa sharapaty mol osynaý mamandyqpen aınalysýdyń ózi - otbasy úshin maqtanysh».

Sonymen qatar marapatqa laıyq dep tanylǵandardyń ishinde 14 doktor shyqqan Tóleýtaevtar men Gınnes rekordtar kitabyna attary jazylýǵa laıyq áýlet - Aıtbekovter otbasy da shaqyrylǵan. Olardyń januıalarynan 20 adam temirjolshy mamandyǵyn tańdaǵan.

Talaı jyldar boıy bir mamandyqty atadan balaǵa mıras etip kele jatqan osy áýletterdiń aǵa býynymen tildesýge Astana medısınalyq ýnıversıtetiniń stýdentteri, kolej jáne JOO oqýshylary, Kóshbasshysy Kitaphanasy janyndaǵy «Kemer el» jastardy tárbıeleý ortalyǵynyń músheleri keldi.

Eńbek adamdarynyń estelikteri jınalǵan jastardy eliktetkeni sonshalyq, stýdentter saýaldardy kóp jaýdyrdy.

Uıymdastyrýshylardyń ózderi bul sharanyń basty maqsaty - eńbek áýletterin qurmetteý, óskeleń urpaqtyń boıynda adal eńbekke degen qyzyǵýshylyǵyn týdyrý, bolashaq mamandyǵyna degen kózqarastaryn qalyptastyrý deıdi.