Memleket basshysynyń tapsyrmasy boıynsha qańtar oqıǵalarynyń nátıjesinde zardap shekken shaǵyn jáne orta bıznes sýbektilerine tólem tóleý jumystary aıaqtaldy. Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte málimdedi.

Onyń aıtýynsha, jalpy 14,5 mlrd teńgege 1594 ótinim maquldandy.

«Shaǵyn jáne orta bıznes – qala ekonomıkasynyń negizi. Onda eńbekke qabiletti halyqtyń 64%-y jumys isteıdi. Sondyqtan bıznesti qoldaýǵa erekshe kóńil bólinedi. 2022 jyly búdjetten qosymsha 5 mlrd teńge bólinip, 47 mlrd teńgege deıin ulǵaıtyldy. Búginde 16,5 mlrd teńgege shaǵyn jáne orta bıznestiń 219 jobasy qarjylandyryldy. Nátıjesinde, 1 maýsymda belsendi jumys isteıtin shaǵyn jáne orta bıznes sýbektileriniń sany bir jylda 19,5%-ǵa 233 myńǵa deıin ósti», - dedi Dosaev.

Sondaı-aq, ınvestısıalyq belsendiliktiń ósýi baıqalady. Osy jyldyń 5 aıynda jeke ınvestısıalar kólemi 22,1%-ǵa ósti. Eń úlken ósim qurylys ındýstrıasynda, ónerkásipte, kólik jáne qoımalaýda tirkeldi, olardyń úles salmaǵy 55%-dy quraıdy.

«Bıyl İ jarty jyldyqta 132 mlrd teńgege 10 ınvestısıalyq joba iske asyryldy, 183 jumys orny quryldy. 2022 jylǵa eńbek ónimdiligi joǵary 2,8 myń turaqty jumys ornyn qura otyryp, 588 mlrd teńge somasyna 77 jeke jobany iske asyrý josparlanǵan»,  - dedi Dosaev.