Jaqynda «Nur Otan» partıasy Almaty qalalyq fılıalynyń otyrysyn ótkizgen fılıal tóraǵasy, qala basshysy Baýyrjan Baıbek myrza bilim berý men densaýlyq saqtaý salalarynyń basshylaryna taǵy da shúılikken. Bul týraly «Qamshy» portaly nur.kz-ke silteme jasaı otyryp habarlaıdy.

Qala ákiminiń kóńiline jaqpaǵan bul salalarda keleńsiz jaıttar jıi  qaıtalanatyny jasyryn emes. Mysaly, ótken jyly 5 mektep dırektory men bir aýdandyq bilim bóliminiń basshysy qyzmetinen bosatylsa, bıyl taǵy 4 mektep dırektory qarjylyq qylmysy úshin jaýapkershilikke tartylǵan.

Dál osyndaı shıkilikter qaladaǵy densaýlyq saqtaý salasynda da joq emes. Jyl basynan beri qaraı, 5 medısına mekemesiniń basshysy qyzmetinen qýylsa, taǵy eki bas dárigerge qatysty qylmystyq is qozǵalyp, qazir tergeý jumystary júrgizilip jatyr.

Mundaı jáıtterdiń aldyn alý úshin qala bıligi endi turǵyndardyń aryzy boıynsha áreket etpek.

“Keıde bas dárigerlerdiń aldyna kirý meniń kabınetime kirýden de qıyn. Bireýge qońyraý shaldyrmaı  bara almaısyń. Joǵarydan bireýdiń buıryǵy kelmeı adamǵa durys qaramaıdy. Mundaı jaıttardy anyqtaý úshin turǵyndardyń aryz-shaǵymy boıynsha saraptama júrgizip otyratyn bolamyz”, – dedi Almaty qalasynyń ákimi Baýyrjan Baıbek.

Aıta keteıik, osyǵan deıin buqaralyq aqparat quraldarynda qala basshysy qalalyq balalar aýrýhanasynyń basshysyn qyzmetine salǵyrt qaraǵandyǵy úshin jumystan qýǵandyǵy jazylǵan bolatyn.

 «Qamshy» silteıdi