2021 jyly Marat Nurajy men Aıgúl Nurajy esimdi aǵaıyndylar Nú-Iork qalasynyń qazaqtaryn qoldaý maqsatynda arnaıy «KCSG» atty qor ashqan. Marat Nurajy atalǵan qordy ashýǵa ne sebep bolǵanyn jáne aldaǵy maqsaty jóninde aıtyp berdi.

«Ózim amerıkalyq qazaq bolǵasyn, qazaq balalaryn qorǵaýdy maqsat ettim. Sol sebepti qazaq balalaryn qorǵaý uıymyn ashýdy qolǵa aldym. 2021 jyldyń 11 shildesinde «Marine» atty parkte qor qurý úshin qaıyrymdylyq sharasyn ótkizip, qarajat jınaı bastadyq. İsh-sharaǵa Nú-Iork qalasynyń qazaqtary kóptep kelgenin baıqadym. Bul meni tipten jigerlendire tústi. Sóıtip, qordyń jumysyn damytýǵa bilek sybana kirisip kettik», deıdi Marat Nurajy.

Marat pen Aıgúldiń ákesi Nurshat Nurajy Astana qalasyndaǵy Nazarbaev ýnıversıtetinde profesor bolyp qyzmet atqarady. Ol da birneshe jyl buryn Nú-Iork qalasynda bilim alyp, profesor dárejesin qorǵaǵan.

«Biz Nazarbaev ýnıversıtetindegi «Balalardy damytý» uıymymen tyǵyz baılanys quryp, birlesip jumys isteýdi josparladyq. 2022 jyldyń kókteminen bastap sol uıymmen birge áleýmettik jaǵdaıy tómen qazaq balalaryna bilim berip, kómek kórsete bastadyq. Bıylǵy jyldyń aqpan aıynda ZOOM arqyly qazaqstandyq balalarǵa aǵylshyn tilinen sabaq berdik», deıdi qor ókili.

Aǵaıyndy Nurajylar 25 maýsymda Qazaqstanǵa qonaqqa keldi. Bul – Nú-Iork qalasynda dúnıege kelgen aǵaıyndylardyń Qazaqstanǵa jasaǵan alǵashqy sapary.

«Buǵan deıin onlaın túrde sabaq bergen edik. Qazaqstanǵa kelgen kezde oqýshylarymyzben kezdesip, oflaın túrde sabaq berý baqyty buıyrdy. Oqýshylarymyzdy qyzyqtyrǵan suraqtarǵa jaýap berip, sheteldegi mektepter men ýnıversıtet týraly aıtyp berdik. Olar Nazarbaev ýnıversıetine buryn baryp kórmegen eken. Biz balalardy ertip, ýnıversıtetti birge araladyq», deıdi Marat Nurajy.

Budan keıin de Marat Nurajy men Aıgúl Nurajy qordyń jumysyn jandandyryp, qazaq balalaryna bilim berýdi jalǵastyra bermek.