Qazaqstandyqtarǵa «sábes», «GSVP», «BTI», tipti HQKO (SON) degen sózderdi umytýǵa týra keletinge uqsaıdy. Qazirgi kezde halyq arasynda osylaı atalatyn uıymdar endi tarıh qoınaýyna ketpek. Bul týraly Qamshy portaly Aıqyn-aqparatqa silteme jasaı otyryp habarlaıdy.

Olardyń ornyna memleket atynan buqaramen baılanys jasaıtyn alpaýyt korporasıa qurylady. Keshe Parlamentte «memlekettik qyzmet kórsetý máseleleri» boıynsha qoldanystaǵy ulttyq zańnamany ózgertetin jańa zań jobasynyń tusaýy kesildi. Bul qujat «Azamattar úshin úkimet» (Azamattarǵa arnalǵan Úkimet) qurýdy qarastyrady. 

Jobany qalaýlylarǵa tanystyrǵan Investısıalar jáne damý vıse-mınıstri S.Sársenovtyń túsindirýinshe, «Azamattar úshin úkimet» degen uǵym budan bylaı memlekettik qyzmetterdiń biryńǵaı provaıderi bolyp tabylatyn korpora­sıanyń qyzmetin bildiretin bolady. 
Sáken Sársenov HQKO-lardyń nesimen «unamaı» qalǵanyn túsindirdi: onyń málimetinshe, qazaqstandyqtar ábden boı úıretken «halyqqa qyzmet kórsetý ortalyqtarynyń» basty artyq­shylyǵy – qyzmetterge teń qol­je­tim­dilikti qamtamasyz etý, barlyq derlik qyzmetterdi bir jerden alý múmkin­digin usyný jáne sheneýnikter men azamattar arasyndaǵy tikeleı baılanysty bol­dyr­maý arqyly sybaılas jemqorlyq joıý bolǵan. «Alaıda HQKO-lar azamattardan ótinishterdi qabyldaý men qajetti qujatty berýge ǵana jaýapty boldy» deıdi vıse-mınıstr.

– Buǵan deıingi oń tájirıbesi eskerile otyryp, HQKO-lar bazasynda memqyz­metterdiń biryńǵaı provaıderi qurylatyn bolady. Bul jerde Kanadanyń tájirıbesi úlgige alynady: bastapqy kezeńde jer qa­ty­nastary, jyljymaıtyn múlik, áleýmet­tik jáne zeınetaqy tólemderin tóleý sala­syndaǵy eń kóp talap etiletin memlekettik qyzmetterdi «Azamattar úshin úkimet» kor­porasıasyna berý usynylýda, – dedi Sáken Sársenov. 

Osynaý jańa turpatty alpaýyt mem­lekettik korporasıa qurylýy úshin qazir jumys jasap jatqan birneshe sheshýshi «RMK»-lar bir-birine biriktiriledi. Nátı­jesinde, bul korporasıa tek ótinishterdi qabyldaýmen shektelmeı, olardy óńdeý-men jáne máseleni sheshýmen aınalysa alady. 
Máselen, búginde baspananyń qujat­ta­ryn rásimdeý úshin azamattar birese sáýlet organyna, birese «Jyljymaıtyn múlik ortalyǵyna», tipti HQKO-ǵa júgirýine týra keletin. Endi bul qyzmetterdiń barlyǵy bir jerden kórsetilýi kerek. – Bul zań jobasynyń negizgi maqsaty – memlekettik qyzmetterdi kórsetý sapasyn túbegeıli jaqsartý jáne merzimderin qys­qartý, sondaı-aq servıstik kompanıalar­dyń qyzmetterin qosa alǵanda, klıent­ter­men jumystyń tolyq sıklynyń ortalyq­tandyrylǵan júıesin qurý bolyp tabylady. Buǵan qosa, joba memlekettik qyzmetter sapasynyń biryńǵaı standarttaryn engi­zýdi, memqyzmetterdiń aıqyndylyǵy men qoljetimdiligin arttyrýdy kózdeıdi, – dedi vıse-mınıstr. 
Bul rette bastapqyda «Jer kadastry­nyń ǵylymı-óndiristik ortalyǵy», «Jyl­jymaıtyn múlik ortalyǵy», «Zeınetaqy tó­leý jónindegi memlekettik ortalyǵy» (GSVP) sekildi 3 respýblıkalyq memle­kettik kásiporyndy joıyp, olardyń fýnk­sıalaryn HQKO negizinde qurylatyn kor­porasıaǵa berý qarastyrylady. Olardyń barlyǵy endi «Azamattar úshin úkimet» dep atala bastaıdy. Keıin onyń qanatynyń as­tyna basqa da memlekettik mekemeler kóshýi yqtımal. 
S.Sársenov «HQKO» (SON) ataýy bu­dan bylaı qoldanystan shyǵarylatynyn rastady. 
Májilis depýtaty Maıra Aısına osy alpaýyt korporasıany qurý úshin birneshe RMK-ny biriktirý kezinde qyzmetkerler sanynyń qysqarýy yqtımaldyǵyn jet­kizdi. 
– Sózsiz, qysqartýlar júredi. Óıtkeni tórt iri kásiporyn ornyna bir alyp kor­porasıa jumys jasaı bastaıdy. Tıisinshe, olardyń árqaısysynda barlyq kómekshi-qosalqy laýazymdar qysqaratyn bolady. Ákimshilik, búdjettik, qarjylyq organ­dary bar, bir korporasıa astynda osyndaı birin-biri qaıtalaıtyn tórt qurylymǵa de­gen qajettilik bolmaıdy. Sondyqtan oń­taı­landyrý kútilýde, – dedi jýrnalıserge túsinikteme bergen M.Aısına. 
Qalaýlynyń aıtýynsha, dál qazir qan­sha qyzmetkerdiń qysqartýǵa iligetinin aıtý qıyn: «Bizge qazir tórt RMK-nyń barly­ǵynyń jumysyn qarap, aýdıt júrgizý qa­jet. Bul máseleni sonda oılastyratyn bo­lamyz. Bul úshin korporasıanyń shtaty qansha bolatyny eskeriledi» dedi ol. 
Jańa memlekettik korporasıa 2016 jyl­dyń İ toqsanynda jumys jasaı bas­taıdy dep josparlanýda. 
Jalpy, «Azamattar úshin úkimet» mem­korporasıasy Elbasy N.Nazarbaev ja­rıalaǵan Bes ınstıtýsıonaldyq refor­ma­ny júzege asyrýdyń «100 qadamy – Ult josparyna» saı qurylǵaly otyr. 
Qazaqstan kóshbasshysy «memlekettik qyzmetter kórsetý kezinde azamattarǵa qo­laıly jaǵdaılar jasaý úshin» Kanadadaǵy Canada Service jáne Avstralıadaǵy Centre­link úlgisin paıdalanýdy usynǵan edi. Bul barlyq qazaqstandyqtarǵa barlyq qajetti memlekettik qyzmetterdi bir jerden alýyna múmkindik beredi.