Memleket basshysy Nursultan Nazarbaev Atyraýda Aqtóbe, Batys Qazaqstan, Atyraý jáne Mańǵystaý oblystarynyń ákimderimen jáne munaıly ólkedegi iri óndiris basshylarymen kezdesip, keńeıtilgen keńes ótkizdi.
Jıyn barysynda Nursultan Nazarbaev eldi ındýstrıalandyrýdyń jáne
«Nurly jol» jobasyn júzege asyrýdyń jaıyna toqtaldy. Bul týraly Aqordanyń baspasóz qyzmeti habarlady.
— Qytaı Halyq Respýblıkasyna sapar barysynda biz qytaı tarapymen somasy 23 mıllıard dollar bolatyn kelisimshart jasastyq, ondaǵan nysandy iske qosý josparlanyp otyr. Birlesken kásiporyndar ártúrli sharttar negizinde qurylatyn bolady, — dedi Nursultan Nazarbaev. Sonymen qatar, Memleket basshysy «Nurly jol» baǵdarlamasy Qazaqstan úshin tıimdi transqurlyqtyq logıstıkalyq joba bolyp sanalatyn «Jibek joly» ekonomıkalyq beldeýin qurý bastamasymen sabaqtasatynyn aıtty.
— Bul baǵytta qazirdiń ózinde az jumys istelgen joq. Búginde Qytaıdaǵy Lánúngan portyndaǵy bizdiń termınalmen ATM (Azıa-Tynyq muhıt) elderinen Qazaqstan arqyly Eýropaǵa 250 myń konteıner jiberilip jatyr. 2020 jylǵa qaraı ol eki eselenedi. Bul poıyzdardyń júrip ótetin jolynda bıznes-qurylymdar paıda bolady. Sonymen qatar Batys Eýropa — Batys Qytaı jolynyń qurylysy aıaqtalýǵa taıap qaldy. Bul joba da zor múmkindikterge ıe. «Nurly jol» baǵdarlamasy aıasynda batys óńirde somasy 345 mıllıard teńge bolatyn jobalar júzege asyrylady. Birinshi ret bizdiń elde kemeler men paromdar qurastyratyn kombınat salynýda. Reseıge shyǵatyn Aqtóbe — Atyraý, Atyraý — Astrahan, Oral — Kamenka avtomobıl joldary salynyp jatyr. Bul jobalardyń barlyǵy ekonomıkamyzǵa serpin berip, jańa jumys oryndaryn ashýǵa septigin tıgizetin bolady, — dedi Memleket basshysy.
Keńeste Elbasy Qazaqstandaǵy ónerkásiptik ónimderdiń jartysy eldiń batys óńirindegi tórt oblysta óndiriletinin atap ótti.
— Bul oblystardyń damýynyń búkil ekonomıkamyz úshin mańyzy zor. Jer aýmaǵynyń úlkendigine baılanysty eldiń ár óńiriniń ózindik ereksheligi bar. Batys munaı óndirýge jáne óńdeýge mamandanǵan. Soǵan baılanysty biz naq osy salanyń damýyna mol ınvestısıa salyp jatyrmyz, — dedi Elbasy.
Bul oraıda Nursultan Nazarbaev óńirde ınfraqurylymdyq qurylys aýqymyn keńeıtý qajettigin aıtty.
Memleket basshysy tórt oblystyń ákimine munaı-gaz salasynyń aınalasynda shaǵyn jáne orta bıznesti damytýdy tapsyrdy.
— Atyraý oblysynda shaǵyn jáne orta bıznes úlesi 8 paıyzǵa, Mańǵystaý jáne Aqtóbe oblystarynda 17 paıyzǵa teń. Biraq munaıly óńirde shyǵarylatyn ónim kólemin keńeıtýge yqpal jasaý kerek. Sonyń arqasynda jańa jumys oryndary ashylady, — dedi Memleket basshysy.
Elbasy óndirýshi kásiporyndardyń qajettilikterin qamtamasyz etý úshin ındýstrıalyq aımaq qurý máselesin qozǵady.
— Mysal retinde Shevron kompanıasyn aıtýǵa bolady, onyń jumysyn armatýra jáne qubyr shyǵaratyn zaýyttar qamtamasyz etedi, sáıkesinshe óńirdiń áleýmettik damýyna qajetti qarajat túsýde, — dedi N.Nazarbaev.
Elbasy sondaı-aq ındýstrıalandyrý jáne ınfraqurylymdar qurylysy jónindegi josparlardy jańa ekonomıkalyq jaǵdaıdy eskere otyryp qaıta qaraýdy tapsyrdy.
Jıynda sóz alǵan bizdiń oblystyń ákimi Berdibek Saparbaev atqarylatyn jumys josparlary týraly aıta kele, Úkimetke ótinishin bildirdi.
— Bir ótinishim bar. Aqtóbe men Atyraýdyń arasyndaǵy salynyp jatqan jol erteń Reseı shekarasyna shyǵady. Áset Órentaıulyna, ótinish. Barlyq qujat daıyn. Qyrkúıekte tender ótkiziledi. Sol tez ótip, sol jumys bıyl bastalsa eken, — dedi Berdibek Saparbaev.
Memleket basshysy Nursultan Nazarbaev Aqtóbe oblysynyń ákimi Berdibek Saparbaevpen kezdesti.
Kezdesý barysynda Nursultan Nazarbaev resýrstardyń baǵasy tómen bolǵan jaǵdaıda aıtarlyqtaı joǵary qosymsha qundy qamtamasyz ete alatyn munaı hımıasy salasyn damytýǵa aıryqsha kóńil bólýdi tapsyrdy. Sondaı-aq, jańa jumys oryndarynyń ashylýyna sebep bolatyn birqatar ındýstrıalyq jobalardy damytý perspektıvalary da talqylandy.
Internet materıaldary boıynsha ázirlendi
qamshy silteıdi
derekkóz: qazaquni.kz
