2023 jyldyń 15 naýryzynda Almaty menedjment ýnıversıtetinde «Techno Women Central Asia: Ózińe sen!» atty IT salasyndaǵy áıel kásipkerlerdiń eń ózekti máselelerin talqylaýǵa arnalǵan forým ótti. Oǵan Qazaqstan, Qyrǵyzstan jáne Ózbekstannan tanymal jáne tabysty áıelder qatysty. 

İs-sharanyń sońynda «Ýnıversıtetter jáne tehnologıalyq bıznes: tıimdi ózara is-qımyl praktıkasy» taqyrybynda jabyq dóńgelek ústeli ótti.

«Búgin biz sarapshylardy erekshe qyzyǵýshylyqpen tyńdadyq, jas kásipkerlerdiń jetistikteri týraly áńgimelerden shabyt aldyq. Sondaı-aq áıelder bıikti baǵyndyrý úshin qanshama ıdeıany júzege asyrýǵa daıyn ekenine kýá boldyq. Olardy sál ǵana demep jibersek, alatyn asýlary az emes. Alaıda áıelderdiń túpsanasyn ózgertip, shyn máninde bıik qamaldardy alý úshin qyzdarǵa óz-ózine senimdi bolýdy úıretip, tárbıeleýimiz óte mańyzdy. Olardy IT tehnologıalary týraly zamanaýı bilimmen qamtamasyz etýimiz qajet. Al bul máseleni sheshý úshin elimizdiń jetekshi joǵary oqý oryndarymen yntymaqtastyq ornatý biz úshin mańyzdy. Bul barlyǵymyzǵa ortaq is, sol sebepti birigip osy máselelerdi talqylaı bilý de mańyzdy», - deıdi Techno Women qaýymdastyǵynyń prezıdenti Azıza Shýjeeva.

 «Qoǵamdyq birlestikter men akademıalyq qoǵamdastyq ókilderi, medıa jáne basqa da múddeli taraptardyń birigýi arqyly áıelderdiń máselesin sheshe alamyz. Olardyń talanty, shyǵarmashylyǵy men energıasy elimizdiń jáne búkil óńirimizdiń ıgiligi úshin iske asyrylýy tıis», - dep AlmaU rektory Gúlnar Kúrenkeeva memorandým mańyzdylyǵyn erekshe atap ótti.

Dóńgelek ústeldiń qorytyndysy boıynsha Techno Women qaýymdastyǵy Almaty Menedjment Ýnıversıtetimen ózara túsinistik týraly memorandýmǵa qol qoıdy.