Aqparattyq–tehnologıalar qaryshtap damyǵan zamanda suranysqa ıe mamandardyń biri – IT salasynyń qyzmetkerleri. Jasandy sananyń damýy adamzattyń aqyry ma, aqyly ma? Osy oraıdy "Daryn.online", "ordagen.kz" jobalarynyń avtory, IT maman ári kásipker Nurbaqyt Juldyzbaı jasandy ıntellekt boıynsha jumys isteıtin baǵdarlamalaýshy Aıtan Qametten suhbat aldy.

Suhbat barysynda IT salasynyń ótkeni men bolashaǵy sóz boldy. Robottardyń paıda bolýy adamzat jumysyn jeńildetkeni sózsiz, biraq sonyń saldarynan jumys ornynan aıyrylǵandar da joq emes.

Jaqynda Ilon Mask bastaǵan bir top IT maman jasandy sananyń damýyna shekteý qoıý keregin aıtyp, dabyl qaqqan edi. Alaıda qazaqstandyq programmıster jasandy sananyń damýyn qoldaıtynyn málimdedi.

"Jasandy sana damý satysynyń shyńyna jetkende memlekettiń jumysy tek qana adamdardy tamaqtandyrý bolyp qalady. Sebebi  jumystyń bárin robottar jasap, adamdar óz ýaqytyn  rýhanı damýǵa ǵana arnaıdy" – dedi Nurbaqyt Juldyzbaı. 

Al Aıtan Qamet adamzattyń jasandy sanany damytýdaǵy basty maqsaty robottardy qara jumysqa salý arqyly bar ýaqytyn óz ıdeıalaryna arnap, jasampazdyqqa bet burý ekenin aıtty.

Sonymen qatar, suhbat barysynda adamzattyń jasandy sananyń damýy arqyly jetken jetistikteri sóz boldy. 

Suhbattyń tolyq nusqasyn Qamshy Voice Ýoutube kanalynan kóre alasyzdar.