Almaty qalasynyń ákimi Erbolat Dosaev "Samuryq-Qazyna" UÁQ " AQ Basqarma Tóraǵasy Nurlan Jaqypovpen kezdesti, dep habarlaıdy Qamshy.kz aqparat agenttigi. 

Kezdesý barysynda taraptar megapolıstiń energokeshenin («Samuryq-Energo» AQ, «Almaty energetıkalyq stansıalary» AQ, «Alataý jaryq kompanıasy» AQ «Samuryq-Qazyna» UÁQ» AQ quramyna kiredi) damytý perspektıvalaryn, onyń ishinde JEO-2 gazǵa aýystyrý, jylý magıstraldaryn, elektr jelilerin jańǵyrtý máselelerin, Almaty aglomerasıasynyń turǵyn alaptaryn odan ári gazdandyrý, qoǵamdyq kólikke arnalǵan gaz quıý stansıalaryn salý, «Jaıly mektep» ulttyq jobasyn iske asyrý jáne taǵy basqalaryn talqylady. Kezdesýge «Samuryq-Energo» AQ, «Qazaqgaz UK» AQ, «KEGOC» AQ, «Samruk-Kazyna Construction» AQ, «Alataý jaryq kompanıasy» AQ basshylary qatysty.

Qala basshysy Erbolat Dosaev qalany turaqty jylý jáne energıamen qamtamasyz etý, zalaldy zattar shyǵaryndylary kóleminiń aıtarlyqtaı tómendetý Almatyny ekologıalandyrý men dekarbonızasıalaý úshin asa mańyzdy basymdyqtar bolyp tabylatynyn atap ótti. Búginde megapolıstegi aýanyń lastanýynyń negizgi sebepteriniń biri JEO-2 bolyp tabylady, mamandardyń baǵalaýy boıynsha zalaldy shyǵaryndylardyń 30%-na deıin oǵan tıesili. Qala ákimi JEO-2 gazǵa aýystyrýdy belgilengen merzimde júrgizý qajet ekenin atap ótti. Memleket basshysynyń tapsyrmasyna sáıkes birinshi kezeńdi 2024 jyldyń jeltoqsanynda aıaqtaý josparlanýda. «Samuryq-Qazyna» UÁQ» AQ basshylyǵy merziminde úlgerýge daıyn ekendigin rastady. Jalpy, JEO-2-ni gazǵa aýystyrý birinshi kezeńdi iske qosý kezinde zalaldy shyǵaryndylar sanyn – 35 myń tonnadan 23 myń tonnaǵa deıin, 2026 jyly tolyq iske asyrý kezinde – 2,7 myń tonnaǵa deıin tómendetýge múmkindik beredi.

Kezdesý barysynda JEO-2 – BQK qosatyn jylý magıstralin qaıta jańartýǵa erekshe nazar aýdaryldy. Qazirgi ýaqytta qubyrlar dıametriniń ózgerýine baılanysty jobalaý-smetalyq qujattamany túzetý qajet. Olardy jańǵyrtý jylý trassasynyń jeke turǵyn úılerge jaqyn ótýine baılanysty qıyn. Holdıń qalalyq bılik tarapynan jobany iske asyrýdy qoldaý týraly máseleni kóterdi.

Taraptar sondaı-aq qalany ekologıasynyń mańyzdy quramdas bóligi bolyp tabylatyn gazdandyrý jónindegi aldaǵy josparlardy talqylady. Almaty boıynsha gazdandyrý 99,2%-dy quraıdy, bul rette 1074 jeke turǵyn úı jáne baý-baqsha seriktestikteriniń saıajaı massıvterinde ornalasqan 1677 úı gazǵa qosylmaǵan kúıinde qalyp otyr. «QazTransGaz Aımaq» AQ aqparaty boıynsha, aǵymdaǵy jyly 355 jeke turǵyn úıdi qosý úshin 23,2 km gazben jabdyqtaý jelisin salý josparlanǵan. Nátıjesinde Almatynyń gazdandyrý deńgeıi 99,4%-dy quraıtyn bolady. Sonymen qatar, Almaty oblysynyń shekaralas tórt aýdanynyń jylytý kezeńinde lastaýshy zattardyń shyǵaryndylaryn azaıtý jáne olardyń qala ekologıasyna, ásirese jeldiń uıytqı soǵýyna baılanysty keri áserin azaıtý úshin gazdandyrýdyń asa qajettiligi atap ótildi.

Keńeske qatysýshylar jelilerdi jańǵyrtý prosesin jedeldetý úshin ınvestısıalyq baǵdarlamany jáne ınvestısıalyq saıasatty keńeıtý máselelerin talqylady. Mysal retinde «Alataý jaryq kompanıasy» AQ ókilderi búginde qalanyń elektrmen jabdyqtaý jelileriniń tozýy 93%-dy, transformatorlyq qosalqy stansıalardyń tozýy 65% -dy, al taratý qosalqy stansıalarynyń tozýy – 75%-dy quraıtynyn aıtty.

Kezdesý barysynda taraptar «Samruk-Kazyna Construction» AQ-nyń «Jaıly mektep» ulttyq jobasyn iske asyrý jónindegi biryńǵaı operator retindegi mańyzdy rólin atap ótti. Joba aıasynda Almatyda 22 mektep (37 myń oqýshy orny, 14 mektep «Samuryq-Qazyna» UÁQ» AQ qarajaty esebinen, 8 mektep – jeke ınvestorlardyń qarajaty esebinen) salý josparlanýda, bul Almatynyń memlekettik mektepterindegi oryn tapshylyǵyn edáýir tómendetýge múmkindik beredi. Qazirgi ýaqytta Almaty ákimdigi jer ýchaskeleri boıynsha máselelerdi sheshti, búdjette ınjenerlik jelilerge qarajat kózdelgen, qujattardy birlesip daıyndaý júrip jatyr.

Kezdesý qorytyndysy boıynsha taraptar «Samuryq-Qazyna» UÁQ AQ men Almaty ákimdiginiń birlesken jobalaryn iske asyrý jónindegi odan ári qadamdar týraly ýaǵdalasty.