Úkimet otyrysynda áleýmettik tólemderdiń qashan ósetini týraly aıtyldy, dep habarlaıdy Qamshy.kz aqparat agenttigi. 

Máselen, Mınıstrler Kabınetiniń baspasóz qyzmetiniń málimetinshe, Prezıdenttiń tapsyrmasyn oryndaý sheńberinde 1 shildeden bastap Memlekettik áleýmettik saqtandyrý qorynan tólenetin eńbekke qabilettiliginen aıyrylý jáne asyraýshysynan aıyrylý jaǵdaılary boıynsha áleýmettik tólemderdiń mólsherin 14,5 paıyzǵa arttyrý júrgiziletin bolady. Tıisti Qaýlyǵa premer-mınıstr qol qoıdy.

Eńbekke qabilettiliginen aıyrylý boıynsha áleýmettik tólemderdi arttyrýmen 92 myńǵa jýyq alýshyny, asyraýshysynan aıyrylý boıynsha – 61 myń otbasyn qamtý josparlanýda.

Qaýly 2023 jylǵy 1 shildeden bastap qoldanysqa engiziledi jáne resmı jarıalanýǵa tıis.

Esterińizge sala keteıik, 1 qańtardan bastap respýblıkada eń tómengi jalaqy mólsheri 60 myń teńgeden 70 myń teńgege deıin ulǵaıtyldy. Bul ekonomıkanyń barlyq salalarynda jumys isteıtin 1,8 mıllıonǵa jýyq jaldamaly jumysshylarǵa áser etti.

Jalaqy deńgeıin belgileý kezinde ETJ kórsetkishin paıdalanatyn uıymdar, sondaı-aq razrádaralyq biliktilik júıesin eskere otyryp, qyzmetkerlerdiń basqa sanattarynyń jalaqylaryn arttyrý jaǵyna qaraı qaıta qaraıdy.

Budan bólek, 4,4 mıllıon alýshyǵa zeınetaqy men járdemaqynyń barlyq túrleri ındeksteldi.

Úkimet sondaı-aq dárigerlerge, muǵalimderge, búdjet salasynyń basqa da qyzmetkerlerine jáne óndiristik personalǵa jalaqyny kezeń-kezeńimen ulǵaıtýdy kózdeıtin halyqtyń tabysyn 2025 jylǵa deıin arttyrý jónindegi baǵdarlamany iske asyrýdy jalǵastyrýdy eske saldy, sondaı-aq shaǵyn nesıelendirýge qoljetimdilikti keńeıtý esebinen aýyl turǵyndarynyń tabysyn ulǵaıtý jónindegi jobany masshtabtaý bastaldy.