Almatyda qoǵamdyq kólikte júrýdiń jańa tarıfteri bekitildi. Bul týraly máslıhattyń VII sesıasynda Almaty qalasy ákiminiń orynbasary Asqar Ámrın málimdedi.

Ońaı kartasymen nemese QR kody arqyly tólem jasaǵanda jol júrý aqysy 100 teńge bolady. Jol aqysy 20 teńgege kóteriledi. Qolma-qol tólegen kezde jol júrý aqysy úshten birge – 150-den 200 teńgege deıin kóteriledi.

"Qoldanystaǵy tarıf tasymaldaýshylardyń shyǵyndaryn ótemeıdi, óıtkeni naqty tarıf bekitilgennen 3 ese qymbat. Osyǵan baılanysty ákimdik aı saıyn sýbsıdıa túrinde tasymaldaýshylardyń shyǵyndaryn ótep otyr. Osy kezeńge 2020-2022 jyldary tólengen sýbsıdıa kólemi 115,8 mıllıard teńge boldy", - dedi Asqar Ámrın.

Megapolıstiń kólik ınfraqurylymyna túsetin júkteme orasan zor, bul rette joldardyń jaı-kúıi, kólik parkin jańartý, qala basshylyǵynyń jiti nazarynda.

"Qolma-qol aqshasyz tólemge 100 teńge jáne qolma-qol tólemge 200 teńge kóleminde jańa tarıfterdi qoldaný bıylǵy jyly sýbsıdıa kólemin shamamen 10 mıllıard teńgege qysqartýǵa múmkindik beredi. Olardy basqa da áleýmettik mańyzy bar jobalarǵa qaıta bólýge múmkindik týady", - dedi qala ákiminiń orynbasary Asqar Ámrın.