Nan baǵasy birden 30 paıyzǵa ósetin boldy. Jamannyń sandyraǵy keledi degen ras-aý. Osydan birshama ýaqyt buryn Aıqyn Qońyrov degen bir depýtat nannyń qunyn atasymen ólshep, tup-týra 300 teńge turý kerek dep kesken bolatyn.

            Nege deseńiz Eýropada nan qymbat-mys. Depýtat shyraq sol kezde Qazaqstan men Eýropanyń aılyq eseptegish kórsetkishterin salystyrmady ma eken? Maqul delik. Ózine jasalǵan pıar ma, álde basqa ma ulardaı shýlady da tyndy jurt.

            Endi mine sál ǵana ýaqyttan soń nannyń quny qaıta ósedi degen úkim shyǵyp otyr jáne birden 30 paıyzǵa. Nannyń quny buǵan deıin ár óńirde 35-70 teńge aralyǵynda bolatyn. Endigi kezek bıdaıdyń quny 47 teńgege deıin ósken. Demek, nan da qymbattaıdy.

            Aýyl sharýashylyq mınıstri bıdaıdyń qunyn ustap turý múmkin emes deıdi. Teńge erkin aınalymǵa ketken kezde baǵany qalypta ustaımyz degender qaıda? Sózinde berik bola almasa bılikte nege otyr?

            Qońyrovty nege eske aldyq deısiz ǵoı, burynnan kele jatqan bir saıası oıyn bar. Qysqasha barysy mynadaı. Bıznes elıtanyń eń kóp qoldanatyn taktıkasy desek te bolady. Eger aksıany 5 paıyzǵa kóterý kerek bolsa, birden 10 paıyzǵa kóterý kerek. Qol astyńdaǵylar  dý ete qalady. Shý bolady. Aqyry mámle jasalý kerek bolady. Sodan soń maqul dep 5 paızǵa túsiredi. Jospar da oryndaldy, qol astyndaǵylar da degenimiz boldy dep máz!

            Maqul 300 teńgege emes, 30-aq paıyzǵa ósedi dep biz máz bolaıyq.

            P.S. Qansha degenmen, buǵan da «túsinistikpen» qaraıyq. Bıdaıy kóp eldiń arzan nan jeýi- «uıat qoı» qaıtsin!