Qadirli, qaǵazstandyqtar! Sizder óz urpaqtaryńyzdy mektepke, JOO-na sapaly bilim alsyn dep beretin shyǵarsyzdar? Ókinerligi, sizderdiń balalaryńyzǵa bilim beretin ustazdar qaýymy qarsha boraǵan qalyń qaǵazdyń astyna kómilip qaldy. Olardy basyp qalǵan qaǵaz barǵan saıyn qalyńdaı túsýde. Ustazdardy qutqaraıyq! Ustazdar arqyly jas urpaqty qutqaraıyq! Ardaqty aǵaıyn! Qazir bastaýysh, orta mektepterde bolsyn, JOO-da bolsyn, múǵalimderdiń ýaqyty men qajyr-qaıratynyń bári túkke keregi joq qaǵaz jazýǵa ketip jatyr. Máselen, ýnıversıtette bir muǵalim eki-úsh pánnen sabaq beretin bolsa, ár pán úshin 50-60 betten turatyn ÝMKD (pánniń oqý-ádistemelik kesheni) daıyndaıdy. Onyń ishinde ótetin sabaǵyńnyń, oqıtyn dárisińniń tolyq mátini, aptalyq, aılyq, saǵattyq jospary, aralyq baqylaý suraqtary, emtıhan suraqtary, kórneki materıaldar, elektrondy quraldar, saıtannyń sapalaǵy... sekildi ıtbaı-shortbaıdyń bári bolý kerek. Budan tys, ár muǵalimde qoǵamdyq mindetter (tárbıe jumysyna jaýapty, ǵylymı jumysqa jaýapty, praktıkaǵa jaýapty, SMK-ǵa jaýapty, kásiptik baǵdarǵa jaýapty, jumysqa ornalastyrýǵa jaýapty...t.s.s) bolady, olardyń ózine atan túıege júk bolatyn papkalar daıyndalady... Eki kúnniń birinde attandap tekserý, ár túrli komısıa, attestasıa... keledi. Olar oqý sapasyn tekserse ne armanyń bar?! Jańaǵy qalyń qaǵazdy tekseredi. Sonymen, qazir Qazaqstanda muǵalim baıqustar jas urpaqqa sapaly bilim berýmen emes, tek erteń qoqsyqqa tastalatyn qaǵaz toltyrýmen aınalysýda... Elbasynyń ózi bıik minbeden resmı jınalysta "qaǵazbastylyqty doǵarý" týraly birneshe ret tapsyrma berdi. Oǵan pysqyrǵan adam kórinbeıdi. Kerisinshe údep barady. Al men myna maqalany jazǵan avtorǵa da, ony jarıalaǵan "EQ" gazetinie de rızashylyǵymdy aıta otyryp, jas urpaqqa jany ashıtyn barlyq azamatty ustazdardy qaǵazbastylyqtan qutqarýǵa shaqyramyn. Ustazdar Sizderdiń balalaryńyzǵa, elimizdiń erteńgi egelerine bilim berýmen aınalyssyn!