QYZYLORDA. QazAqparat - Syr dıhandary bıylǵy jyly kúrishtiń ár gektarynan 50,5 sentner ónim jınap, el qambasyna 423 myń tonnadan astam astyq quıdy. Bul el táýelsizdigi kezeńindegi rekordtyq kórsetkish sońǵy 3 jyl boıy qatarynan qaıtalanyp otyr. Bul týraly 3 qazan kúni «Altyn kúz-2015» merekesi aıasynda bıylǵy egin jınaý qorytyndysy boıynsha óndiris ozattaryn marapattaý saltanatynda aıtyldy. Onda oblys ákimi Qyrymbek Kósherbaev aımaqtyń aýylsharýashylyq salasy mamandaryn qol jetkizgen tabystarymen shyn júrekten quttyqtady. 

- Halyqta nesibesi mol eldiń egini bitik shyǵady degen sóz bar. Keshe ǵana Syr dıhandary ala jazdaı kútip baptaǵan eginderin jınady. Bıyl da eginshilerimiz mol ónim alyp, úshinshi jyl qatarynan rekordtyq kórsetkish berdi. Sońǵy jyldary oblysymyzdyń aýyl sharýashylyǵy salasy jaqsy damyp keledi. Syr eliniń basty daqyly kúrish óndirisiniń kólemi 11,6% ósip otyr. Mal sharýashylyǵy boıynsha iri qara, jylqy jáne túıe basynyń sany eń berekeli 90-shy jylǵy deńgeıden asyp tústi. Al agroónerkásip keshenine salynǵan ınvestısıa kólemi 7,7 esege ósti, - dedi oblys ákimi Q.Kósherbaev.

Aımaq basshysy oblysta aýyl sharýashylyq salasyn damytýǵa qatysty atqarylyp jatqan jumystarǵa toqtalyp ótti.  Búginde tamshylatyp sýarý ádisimen júgeri jáne qyzanaq egip, krahmal, tomat pastasyn óndirý jobalarynyń alǵashqy jumystary bastalyp ketti. Sondaı-aq, oblys ákimi syr qaýynynyń áleýetin arttyrý kerektigin aıtty. Kezinde Jańaqorǵan men Qazaly arasyndaǵy ár stansıada jumys jasaǵan qaýyn qabyldaý pýnktterin birtindep ashý máselesi boıynsha ınovasıalyq jobalardy iske qosý úshin «Baıqońyr» áleýmettik kásipkerlik korporasıasynyń múmkindikteri qarastyrylatyn bolady.

Aımaqta egin sharýashylyǵymen birge mal, balyq sharýashylyǵyn damytý barysynda da tabystar kóp. Bul salalardy ári qaraı damytý maqsatynda Jańaqorǵan aýdanynda birinshi ret malshylar sleti jáne  Aral aýdanynda birinshi ret balyqshylar sleti ótti.  Aıta keteıik, bıyl oblysta qýaty jylyna 7 myń tonna toqty etin óńdeıtin et kombınatyn jáne iri mal bordaqylaý alańdaryn salý jumystary qolǵa alyndy.

Saltanatty jıynda Qazaqstannyń Eńbek Eri, oblystyq kúrish óndirýshi jáne qaıta óńdeýshiler asosıasıasynyń tóraǵasy Abzal Eralıev Elbasyǵa arnalǵan Úndeýdi oqydy. Munan soń oblys ákimi Q.Kósherbaev oblystyń aýyl sharýashylyǵy salasynyń eńbek ozattaryn 24 túrli nomınasıamen marapattap, zattaı syılyqtar tabystady. Sonymen qatar, «Mal sharýashylyǵy boıynsha ozat aýdan» - Aral aýdany, «Egin sharýashylyǵy boıynsha ozat aýdan» - Syrdarıa aýdany, «Aýyl sharýashylyǵy ónimderin óńdeý boıynsha ozat aýdan» - Qazaly aýdandary marapattaldy. Al egini bitik shyqqan Jalaǵash aýdany naýqan qorytyndysy boıynsha «Úzdik» dep tanyldy. Aýyl sharýashylyǵy salasynyń eńbek ozattaryn marapattaý saltanaty merekelik konsertke ulasty.

Derekkóz: Qaz-Aqparat