Aqmola oblysynda sibir jarasyn juqtyrǵan 5 naýqas anyqtaldy dep habarlaıdy Sputnik Kazahstan. Qazirgi ýaqytta Esil aýdandyq aýrýhanasynda 15 adam em qabyldap jatyr.

Medısınalyq ortalyqtyń bas dárigeri Muhtar Tomtaev naýqastardyń jaǵdaıy birqalypty, ómirlerine qaýip joq ekenin aıtty. Buǵan deıin aýyr jaǵdaıda aýrýhanaǵa túsken naýqastyń da densaýlyǵy qalypqa kelgen.

"Hattamaǵa sáıkes, aýrýhanadaǵy em 14 kúnge sozylady. Sondaı-aq oblystyq densaýlyq saqtaý basqarmasyna bizdiń juqpaly aýrýlar bólimshesinde 15 tósek-oryn baryn eskerttik. Al qalǵan naýqastardy jaqyn mańdaǵy basqa aýrýhanalarǵa jiberetin bolamyz", - dedi bas dáriger.

Bul dert 29 tamyzda Aqmola oblysy Jarqaıyń aýdany Úshqarasý aýylynda tirkelgen. Syrqattyń belgileri:

• joǵary ne turaqty 37,9 ͦ S kórsetkishinen tómen túspeıtin temperatýra;
• qol men bilektegi jaralar;
• lımfa túıinderiniń isinýi;
• jalpy álsizdik;
• tábettiń bolmaýy.

Naýqastardyń barlyǵy 3 myńnan astam mal basy ólgen "Úshqarasý" sharýa qojalyǵyndaǵy etti jegeni belgili boldy.  Aýylda áli de karantın jalǵasýda.