«Islamdyq memleket» ekstremıstik toby óz jaqtastaryn Reseı men AQSH-qa qarsy «qasıetti soǵysqa» shaqyrdy. Bul týraly «Qamshy» portaly bbc.com-ǵa silteme jasaı otyryp habarlaıdy.

Islamısterdiń ókili Mahammad Adnanı ınternette taralyp ketken 40-mınýttyq aýdıojazbasynda  álem boıynsha barlyq musylmandardy orystar men amerıkandyqtarǵa qarsy soǵysqa qatysýyn suranady.

Óz sózinde ol orys pravoslavıelik shirkeý ókili Vsevolod Chaplınniń «Reseıdiń Sırıadaǵy (terorızmge qarsy) áreketi – qasıetti soǵys sanalady» degen sózin keltiredi.

Adnanıdiń bul aýdıojazbasy – Reseıge IM tarapynan tóndirilgen qaýiptiń eń alǵashqy resmı málimdemesi. Óz sózinde ol ıslamısterdiń bas maqsaty AQSH ekenin málimdedi. Sonymen qatar, amerıkandyqtar qorqynysh sezgendikten Avstralıa, Túrkıa, Reseı, Iran kómegine júginip jatqandyǵyn aıtyp, esesine IM-niń kúnnen kúnge kúsheıip jatqandyǵymen maqtandy. Aıta keteıik, ıslamıstik ókil Reseı men AQSH-tyń arasynda shyn máninde seriktestik baılanys bar dep sanaıdy eken. Onyń oıynsha, eki memleket arasyndaǵy qazirgi jaǵdaı kózboıaýshylyqtyń bir kórinisi ǵana eken. Sóz sońynda ol AQSH-tyń erteli-kesh kúıreýge ushyraıtynyn aıtty.

Sonymen qatar, ıslamıstik ókil Abý Mýtaz ál-Kýreıshıdiń ólimin rastady. Qaıtys bolǵan azamat tamyzda ótken amerıkandyq shabýyldyń saldarynan qaza tapqan Fadhıl Ahmad Haıalı, taǵy bir aty Hadjı Mýtaz bolyp shyǵýy ábden múmkin degen boljam bar.

Degenmen, Adnanı óz sózinde IM kóshbasshysy Abý Bakr Bagdadıdyń jaraqattanýyna baılanysty eshnárse aıtpapty.

Sóziniń basym bóligi «Islamdyq memleketke» qarsy shabýyl júrgizip otyrǵan sırıalyq toptarǵa arnalǵan. Olardyń IM-ge qarsy kúresin ol jeńiliske jaqyn áreket dep sanaıtyndyǵyn aıtqan eken.

Mahammad Adnanı óz sózinde mıgranttarǵa da toqtalǵan. Ol bosqyndar bet alyp jatqan Eýropany «kápirler eli» dep atap, ıslamısterdiń soǵys alańy «qasıetti jıhad jerinen» qashyp jatqandarǵa da, olardy qabyldap jatqandarǵa da ábden kiná taqqan. 

Nazgúl NAZAR