Shyǵys Qazaqstan oblysy Rıdder qalasynda 16 mektep bolsa, sonyń bireýi ǵana qazaq mektebi. Onyń ózi sonaý 1936 jyl men 1958 jyldardaǵy qabyrǵasy sógilgen eski 2 ǵımaratta ornalasqan.

Bıyl eski ǵımarattardyń shatyrynyń kez kelgen ýaqytta opyrylyp túsýi múmkin ekenine ári jóndeý jumystaryna qajetti búdjet qarastyrylmaǵandyqtan, mektep jabyldy.

Buǵan deıinde Rıdder qalasynyń turǵyndary qazaqsha bilim beretin mektepke jańa ǵımarat berý máselesin jyldar boıy kóterip kelgen. Biraq qumǵa sý sepkendeı» turǵyndardyń ótinishine jergilikti bıliktegiler pysqyryp ta qaramaǵan.

• 2012 jyly Rıdder qalasyna kóship kelgenimde, bul mekteptiń qabyrǵasy jarylyp jatqan. Sonda mekteptegi muǵalimder men dırektory da qosylyp, jaryq qabyrǵany jamaǵanbyz. Mine, endi mektebimiz ábden tozdy. Balalarymyzdy aralas mektepterge bergimiz kelmeıdi. Olar tek taza qazaq tilinde oqysa deımiz. Mektep muǵalimderiniń bilim berý deńgeıleri óte joǵary. Ókinishke oraı, óńirimizde qazaq mektepterine kóńil bólý óte tómen, – deıdi Rıdder qalasynyń turǵyny Serikqazy Shákirov.

Aıta ketsek, «Shańyraq» mektebi jabylmas buryn onda 580 bala bilim alyp kelgen. Ári mektepte qazaq tilinde bilim beretin saýatty kadrlar da jetkilikti. Turǵyndardyń pikirinshe, qansha jerden mektep tozsa da, mektep oqýshylary bilim, sport jaǵynan respýblıkalyq jarystarǵa qatysyp, kýbok, medaldar ıelenip, jaqsy kórsetkishter kórsetip kelgenin aıtady.