Taýly Qarabaq aımaǵynan birjola ketýdi jón sanaǵan armándardyń alǵashqy toby Armenıaǵa keldi.

Azattyqtyń azerı qyzmeti habarlaǵandaı, olar Armenıanyń ońtústigindegi Súnık aımaǵyndaǵy Kornıdzor aýylyna jaıǵasty. Sol jerde gýmanıtarlyq kómek kórsetý orny quryldy.

Bul jerge sonymen birge Taýly Qarabaqtaǵy qaqtyǵys kezinde jaralanǵan 23 adam jetkizilgen.

Armenıa premer-mınıstri Nıkol Pashınán jeksenbide Ázerbaıjan Taýly Qarabaqtaǵy armándarǵa qaýipsizdik kepildigin berse, ólke olardy qabyldaýǵa daıyn ekenin aıtqan.

Taýly Qarabaqta qazir 120 myńdaı etnostyq armán turady.

Taýly Qarabaqtyń jikshil bıligi Ázerbaıjannyń áskerı áreketterinen keıin úısiz qalǵan jáne Taýly Qarabaqtan ketýdi qalaǵan otbasylar orys áskeriniń kúzetimen Armenıaǵa jetkiziletinin málimdegen.

Resmı Baký Qarabaq turǵyndaryn qorǵaýǵa alyp, reıntegrasıalaıtynyn, qarý-jaraǵyn tastaǵan armán kúshterine raqymshylyq beretinin aıtyp jatyr.

24 qyrkúıekte Armenıa premer-mınıstri Nıkol Pashınán Taýly Qarabaqta "etnostyq qýǵyndaý" qaýipi bolyp jatqanyn, aımaqtaǵy armándardyń qaýipsizdigi úshin jaýapkershilik Ázerbaıjan men Reseı kúshteriniń moınynda ekenin eskertti.