KÓKSHETAÝ. 5 qazan. Shýche qalasyndaǵy respýblıkalyq tirek ortalyǵy sanalatyn Býrabaı aýdandyq sotynyń ǵımaratynda memlekettiń ekonomıkalyq qaýipsizdigi jáne ekonomıka salasyndaǵy qylmystar máselelerin talqylaýǵa arnalǵan halyqaralyq konferensıa bolyp ótti. Bul týraly egemen.kz tilshisi habarlady.

Keleli jıyndy Qazaqstan respýblıkasynyń Joǵarǵy Coty Qazaqstannyń Sýdıalar odaǵymen, Halyqaralyq yntymaqtastyq jónindegi nemis qorymen (IRZ), Amerıkalyq zańgerler qaýymdastyǵynyń ókildigimen (ABROLI) jáne Amerıka Qurama Shtattarynyń halyqaralyq damý jónindegi agenttigimen (USAID) birlesip uıymdastyrdy.

Konferensıaǵa Joǵarǵy Sottyń qylmystyq ister jónindegi qadaǵalaýshy sot alqasynyń tóraǵasy Abaı Rahmetýllın, Joǵarǵy Sottyń sýdıalary, Qazaqstannyń Sýdıalar odaǵy Ortalyq keńesiniń hatshysy Sansyzbek Raıymbaev, respýblıkadaǵy oblystyq jáne oǵan teńestirilgen sottardyń apelásıalyq sot alqalarynyń tóraǵalary, Bas prokýratýranyń, Ishki ister, Qarjy mınıstrlikteriniń, Ulttyq kásipkerler palatasynyń jáne advokattar alqasynyń ókilderi qatysty. Shetelden de birqatar sarapshylar shaqyryldy. Atap aıtqanda, Drezden qalasy prokýratýrasynyń prokýrory Karın Shraıtter-Skvorsov (Germanıa), RF Túmen memlekettik ýnıversıtetiniń konstıtýsıalyq jáne mýnısıpaldyq quqyq kafedrasynyń dosenti, zań ǵylymdarynyń doktory Ivan Tarasevıch (Reseı) sıaqty belgili zańgerler ýaqyt aǵymyndaǵy pikirlerimen bólisti.

Úlken deńgeıli forýmda sóz sóılegen A.Rahmetýllın: «Ekonomıkalyq qylmys jáne sonymen baılanysty ekonomıkalyq qatynastardyń qylmystyq sıpat alýy búginde kez kelgen memlekettiń ulttyq qaýipsizdigine qater tóndiretin eń basty keleńsizdikterdiń biri bolyp tabylady. Ekonomıkalyq qylmystarǵa qarsy tura alatyn senimdi ári tıimdi júıe ǵana elimizdiń egemendigi men táýelsizdiginiń kepili bola alady. Sondyqtan da Qazaqstannyń ekonomıkalyq qaýipsizdigin qamtamasyz etý eń mańyzdy ulttyq basymdyqtardyń biri bolyp tabylady», dedi.

Sonymen qatar, QR Joǵarǵy Sotynyń qylmystyq ister jónindegi qadaǵalaýshy sot alqasynyń tóraǵasy qarjy-ekonomıkalyq daǵdarystyń ǵalamdanýy jaǵdaıyndaǵy ekonomıkalyq qylmystar turǵysynan ekonomıkalyq qaýipsizdik problemasynyń teorıalyq jáne tájirıbelik aspektilerin talqylaý kún tártibindegi ózekti másele ekendigin atap kórsetti.

Eki kúndik konferensıa jumysynyń sheńberinde ekonomıkalyq qyzmet salasyndaǵy qylmystar, sonyń ishinde laýazymdyq qylmystar men kásipkerlik jáne ózge de ekonomıkalyq qyzmetke qarsy qylmystardyń túrleri keshendi túrde talqylandy.

Konferensıa jumysynyń sońynda ishki jáne syrtqy qaýip-qaterlerge qarsy turý tetikterin jetildirýge, qylmystyq sot tóreliginiń quqyqtyq bazasynyń qarqyndy jańartylýy jaǵdaıyndaǵy adamdardyń zańmen qorǵalatyn quqyqtaryn keńeıtýge baǵyttalǵan tıisti usynymdar qabyldandy.

 "Qamshy" silteıdi

Derekkóz: "Egemen Qazaqstan"