BUU-nyń IýNISEF Balalar qorynyń uıymdastyrýymen ótkizilgen arnaıy dáriste álemdegi balalar máselesi talqylandy. Astanadaǵy Aqan Qurmanov atyndaǵy №17 mektep-gımnazıasynyń oqýshylary qatysqan sabaqta Qazaqstan Respýblıkasy Bilim jáne ǵylym vıse-mınıstri Esenǵazy Imanǵalıev pen Qazaqstandaǵy IýNISEF ókili Iýrıı Oksamıtnyı sóz sóılep, oqýshylarmen jahandyq máselelerdi talqyǵa saldy.
Álem boıynsha eń úlken dáristiń alǵashqysy Nú-Iork qalasynda bıylǵy jyldyń 4 qyrkúıeginde «Jahandyq maqsattar» (Global Goals) naýqany aıasynda ótken. Bul sabaq álemniń 193 elindegi balalarǵa BUU Bas Assambleıasy qabyldaǵan turaqty damý maqsattary týraly baıandaý úshin uıymdastyrylǵan. Dáris maqsaty – balalarmen álemdik qaýymdastyq úshin asa mańyzdy sanalatyn máselelerdi talqylaý.
Bıyl eń úlken dárister búkil dúnıejúzi boıynsha kúz boıy ótkiziledi. Barlyq memleketterde bundaı halyqaralyq sabaqtarǵa mınıstrler men úkimet ókilderi qatysady. Dáriste balalar dúnıejúzindegi túıtkildi máselelerdi sheshýdiń jolyn talqylap, álemdi damytýǵa qatysty óz pikirlerin jetkizedi. IýNISEF málimeti boıynsha Qazaqstanda bundaı dárister 7, 500 astam mektepti qamtıdy. Dáriste sondaı-aq, aldaǵy 15 jyl ishinde adamzat aldynda turǵan úsh asa mańyzdy másele qarastyrylady: kedeıshilikti joıý, teńsizdikpen, ádiletsizdikpen, sondaı-aq klımattyq ózgeristermen kúresý. BUU men onyń IýNISEF Balalar qory kedeıshilikti barynsha azaıtyp, búkil balanyń bastaýysh bilimmen qamtylýy úshin jáne álemniń keıbir elderinde ózekti másele bolyp otyrǵan balalar ólimin joıý men mektepterdegi bilim sapasyn arttyrýǵa arnalǵan jobalardy qolǵa alǵan.
«Memlekettik seriktestermen jáne azamattyq sektormen birge biz ár balanyń, sonyń ishinde, múgedek jáne damý erekshelikteri bar balalardyń quqyqtary qurmetteletin, ár búldirshin ata-anasynyń aıaly alaqanynda ósetin qoǵamdy qurý úshin jumys isteýimiz kerek. Ár bala ózin qamsyz, baqytty sezinetin jáne bar qarym-qabiletin damytyp, paıdaly isterge jumsaıtyn qoǵam qurýǵa umtylamyz. Mundaı qoǵamda balalar úılesimdi damyp, ózderin baqytty sezinetin bolady. Jahandyq maqsattarǵa kelsek, sizder oqýda ozat bolyp, bir-birlerińizge syılastyqpen, qorshaǵan ortaǵa aıalaı qarap, tabıǵatqa qamqorlyq kórsetý arqyly sol maqsattarǵa qol jetkizýge qazirden bastap-aq kúsh sala alasyzdar» dedi, Qazaqstandaǵy IýNISEF Ókili Iýrıı Oksamıtnyı, oqýshylardyń aldynda sóılegen sózinde.
Al dáriske qatysqan Qazaqstan Respýblıkasy Bilim jáne ǵylym vıse-mınıstri Esenǵazy Imanǵalıev jahandyq jáne ulttyq maqsattarǵa jetý, eń aldymen, balalar men jastardyń atsalysýyna baılanysty ekenin alǵa tartty. Eń úlken dáriste oqýshylar anımasıalyq fılmder tamashalap, sýret salyp, oıyn oınaý arqyly jahandaǵy ahýal jaıynda túsinikterin keńeıtti. Bul dáriste №17 mektep gımnazıanyń oqýshylary BUU-nyń resmı tilderiniń sanatyna kiretin aǵylshyn jáne fransýz tilderinde baıandama jasap, IýNISEF ókili men vıse-mınıstrge suraqtar qoıyp, oılarymen bólisti.
Sharafat Jylqybaeva
«Qamshy» silteıdi
