«Alma school» kásipkerlik bilim berý mektebiniń jańa ǵımaratyndaǵy kitaphanaǵa kórnekti qalamger, kemeńger tulǵa Muhtar Áýezovtiń esimi, konferens-zalǵa Memleket jáne qoǵam qaıratkeri, ǵalym Dinmuhamed Qonaevtyń, sondaı-aq konferens-holǵa Qazaqstannyń halyq ártisi, kompozıtor Eskendir Hasanǵalıevtiń esimi berildi.

İs-sharaǵa elge eńbegi sińgen qurmetti azamattardyń urpaqtary shaqyryldy.

Belgili qoǵam qaıratkeri, dıplomat Murat Áýezov, Dinmuhamed Qonaevtyń jıeni, jazýshy Dıar Qonaev, Eskendir Hasanǵalıevtiń jubaıy Darıko Sopyjanovna jáne QR eńbek sińirgen qaıratkeri Birjan Hasanǵalıev arnaıy kelip qatysyp, jyly lebizderin bildirdi.

– Muhtar Áýezov naǵyz klasıkke aınalǵan jazýshy. Bul halyqtyń bergen baǵasy. Klasıktiń esimi zamanǵa baılanbaǵan. Kerisinshe, zaman klasıkten qorqady. Osyndaı bıik rýhpen ómir súrgen, nátıjeli eńbek etken tulǵanyń esimi kitaphanaǵa berilgeninde aıryqsha mán bar dep sanaımyn. Jastarymyzdyń bilim alýǵa degen zeıini ashylsyn, – dep Murat Áýezov mekteptiń bastamasyn quptaıtynyn aıtty.

– Dinmuhamed Qonaevtiń esimin qasterlep, mekteptiń bir bólshegin ataǵanyna qýanyshtymyn. Konferens-holda Qonaevtyń ómiri men qyzmeti, el úshin sińirgen eńbegi jaıynda úlken jıyndar ótip, jastarǵa nasıhat júrgiziledi, dep senemin. Áli kúnge deıin esimin esten shyǵarmaı, el bolyp ardaq tutyp kele jatyr. Munyń bári sol kózi tirisinde atqarǵan úlken isteriniń jemisi. Muhtar Áýezov atymen kitaphana ashylǵany da úlken qurmet. Qansha degenmen sol kisiniń urpaǵymyz, onyń ústine mýzeı-úıi meniń basshylyǵymda. Mektep oqýshylary uly jazýshy atamyzdyń kitaptaryn oqysa, tanysa deımiz. Er esimi el esinde saqtalsa bolǵany, – deıdi Dıar Qonaev.

Mektep basshylyǵynyń aıtýynsha, qazaqtyń kórnekti tulǵalary – Muhtar Áýezov pen Dinmuhamed Qonaevtyń esimi kitaphana men konferens-zalǵa berilýi "Alma School" mektebiniń oqýshylardy jan jaqty damyǵan, kókjıegi keń tulǵa etip ósirý úshin jáne qazaqtyń dańqty azamattaryn, olardyń shyǵarmashylyǵy men eńbek jolyn jas urpaqtyń arasynda nasıhattaý maqsatynan týyndaǵan ıdeıa. Ataqty kompozıtor, «Atameken» patrıottyq ániniń avtory Eskendir Hasanǵalıevtiń atyna kongres-holdy berýdegi oıymyz – shyǵarmashyl jastardy damytýǵa qosqan úlesi ekenin jetkizdi.