Memleketke jáne jeke kásipkerlerge úlken shyǵyn ákelgen qandy oqıǵadan soń Almatyda ákimdik ǵımaratynan bastap túgeli qalpyna keltiridi. Alaıda sot kináli dep tanyǵan 24 qańtarshydan materıaldy shyǵyn óndirilmek. Ótemaqynyń jalpy quny 128 mln teńge.
Advokattardyń aıtýynsha, talap-aryzdardan kóptegen shıkilikter anyqtalyp otyr. Memlekettik mekemeler qandaı dáleldemelerge súıenip otyrǵanyn qosyp, iske tirkeýi tıis edi. UQK 24 adamnyń naqty kinásin dáleldeýge tyryspaǵan, negiz jazýdy da qajet dep tappaǵan. Sot kezinde bir de bir aıyptalýshynyń túrin tanyp, dáleldeı almaǵan.
UQK Almaty oblysy boıynsha shekara qyzmetiniń departamenti óz qorytyndysyna advokat qorǵaýyndaǵy azamattarǵa esh qatysy joq múlikterdi qosyp qoıypty. Atap aıtqanda, KamAZ, ÝRAL sıaqty iri avtokólikter men qyzmetkerlerdiń keýdeshe, báteńke sekildi usaq-túıek dúnıelerge deıin tizgen. Onsyz da joqshylyqtan qajyp, qańtarda kóshege shyqqandar endi memleketke qaryz bop qaldy.
Jalǵas Saparhanova, advokat:
– Jábirlenýshiniń ókilderi talap-aryzdaryn naqtylaı almady. Almaty oblysynyń shekara qyzmetiniń ókili ótemaqy somasyn 147 mln teńge dep shyǵaryp qoıǵan. Keıin 128 mln dep azaıtty. Qorytyndy men aryzdaǵy sandar sáıkes kelmeıdi. 2023 jyly19 mamyrda ótken sot otyrysynda da ótemaqynyń mólsherin naqtylaı almaǵanyn. Qolymyzǵa túsip otyrǵan myna talaptyń da zańsyz jáne negizsiz ekenin dáleldeýge biz barymyzdy salamyz. Qańtarshylarǵa kelgen habarlamaǵa sáıkes, 2 qarashaǵa aldyn ala tyńdaý, al 6 jeltoqsanǵa basty sot talqylaýyn taǵaıyndaǵan. Iaǵnı, sottyń sheshimi daıyn degen sóz. QR Azamattyq prosesýaldyq kodeksiniń 30-babynda talapkerler jaýaptylardyń bireýiniń meken-jaıy boıynsha talap-aryzdy berýge quqyly. Biraq is boıynsha 24 qańtarshynyń turǵylyqty orny kórsetilse de, is áskerı sotqa jiberildi. Bul úlken kúdik týǵyzady.
Erkebulan Qaıratuly, advokat:
– Sot tergeýde qylmystyq is qujattaryn zertteý barysynda Qylmystyq kodekstiń 74-babyna sáıkes, jaýapker retinde eshkimdi tanı almady. Tizimdegi 50 dana kevlar shlem men 24 dana temir qalqandy kóterip áketý múmkin emes. İri kólikterdi jaryp jiberdi degeni de aqylǵa syımaıdy. Ol dúnıeler basqa jaqta, aıyptaýshylar basqa jerde júrgen. Oryndary, meken jaılary sáıkes emes. 
Sydyq Erasyl, qańtar oqıǵasyna qatysýshy:
– Áskerı sot árqaısymyzdan 6,5 mln teńge kóleminde ótemaqy talap etip otyr. Ony tóleýge shamam joq jáne ózimdi tóleýge mindetti dep sanamaımyn. Tizimdegi zattardy men búldirmedim. Sotta dálelder keltirmedi. Kýágermin dep kelgenderdiń eshqaısysy bizdiń aramyzdan eshkimdi tanı almady.
Ábýbákir Qanat Maratuly, aıyptalýshy:
– Qańtar oqıǵasy boıynsha isti bolǵan azamattardyń birimin. Basymdy aman saqtap qalý úshin qoıylǵan sharttarmen kelisip, kináni moınyma aldym. Biraq bul múlikterdi zaqymdamaq túgili, men alańnyń mańyna da jolamaǵan edim. Men jeke kásipkermin, qol astymdaǵy jumysshylarym shyqqany úshin meni de tergeýge tartty. 128 mln tegeni 24 adamǵa bólgeni aǵattyq, sebebi alańǵa tek olar ǵana emes, 10 myń qazaqstandyq shyqty. Biraq tergeýge tek biz tústik. Eń soraqysy, jazyqsyz qurban bolyp ketip baramyz.
