Qazaqstannyń ındýstrıa jáne ınfraqurylymdyq damýyna jaýap bergen burynǵy vıse-mınıstr Tımýr Toqtabaevqa 7 jyl bas bostandyǵynan aıyrý jazasy taǵaıyndaldy, dep habarlaıdy Qamshy.kz.

Toqtabaev paıdaly qazbalardyń iri qorlary bar ken oryndaryn onymen úlestes tulǵalarǵa berý kezinde aýyr zardaptarǵa ákep soqtyrǵan laýazymdyq ókilettikterdi teris paıdalanǵany úshin kináli dep tanyldy.

Toqtabaev memlekettik qyzmette qyzmet atqarý quqyǵynan, «Eren eńbegi úshin» memlekettik nagradasynan aıyryldy.

Sosyn qymbat múlikteri tárkilendi:

1. Almaty qalasy, Bostandyq aýdany, Kókshoqy sh/a mekenjaıy boıynsha ornalasqan jer ýchaskesi;
2. Almaty qalasy, Bostandyq aýdany, Almaty baý-baqsha seriktestigi mekenjaıynda ornalasqan turǵyn úı;
3. 2021 jyly shyqqan «Mercedes-Benz Maybach S580 4MATIC» markaly avto;
4. 2021 jyly shyqqan «Bentley Bentayga V8» markaly avto.
5. On úsh komersıalyq uıymnyń qatysý úlesi.

Sonymen qatar, burynǵy vıse-mınıstr T. Toqtabaevqa qatysty qylmystyq isti tergeý sheńberinde memleketke Qostanaı oblysyndaǵy «Shevchenkovskoe» biregeı ken orny qaıtaryldy.

Ken ornynda nıkel (1,075 mln tonna) jáne kobált (585,9 myń tonna) qory bar. Paıdaly qazbalar qorlarynyń quny 5,6 trln teńgeden asady.