Elimizdegi kınoteatrlarda tanymal, jarnamasy jeldeı esken «Búrkit» fılminiń kórsetilimi orys tilinde júrip jatyr!

Kórermender kóptep baratyn keshki ýaqytqa tek orys tilinde qoıyp, túngi seanstarǵa ǵana qazaq tilindegi nusqasy berilgen.

Sonda biz ózimizdiń qarajatqa Reseıdiń tilinde kıno túsirdik pe?

Mádenıet jáne aqparat mınıstrliginiń tapsyrysymen 8 kórkem fılm túsirildi. Atap aıtqanda: «1941 jyldyń jazy», «Hırýrg», «Ómir», «Aqyn», «Aq boz úı», «Molochnaıa devochka», «Obýchenıe Ademokı» jáne «Búrkit».

Ulttyq kınony qoldaý memlekettik ortalyǵynyń kómegimen túsirilgen «Búrkit» ekshn-fılmi 2 qarashada prokatqa shyqty.

Rejıser Danıar Ibragımov buǵan deıin ol «Altynshy post» jáne «Qazbat» sıaqty áskerı boevık janrynda sátti otandyq fılmder túsirgen. Kezekti debúttik fılmine eldiń bergen baǵasy da joǵary. Saıt afıshasynda turǵan onnan asa fılmniń ishinde eń joǵarǵy reıtıń ıelengen. Tek ókinishtisi, orystildi aýdıtorıany tartý úshin fılm Reseıdiń tilinde kórsetilip jatyr. 

Fılmniń túsirilimine arnaıy jasaqtar,  200-den astam merzimdi áskerı qyzmetshiler, QR áskerı jáne avıasıalyq tehnıkasy paıdalanylǵan. QR Ulttyq ulany bas qolbasshysynyń tárbıe jáne áleýmettik-quqyqtyq jumystar jónindegi orynbasary Qaırat Úmbetovtiń sózine súıensek, jedel-izdestirý sharalary bar fılmniń keıbir epızodtary naqty oqıǵalarǵa negizdelgen. İshki ister mınıstrligi, Ulttyq kınematografıany qoldaý memlekettik ortalyǵy túsirilim jumystaryna qoldaý bildirgen.

Túsirilim Almaty oblysynyń kórikti jerlerinde, Esik kóliniń mańynda jáne İle ózeninde ótti. Jumysqa tipti Gollıvýdtan montajdyq rejıser ákelingen kórinedi. Akterler quramyna da tańdaýly óner ıeleri alynǵan. Basty rólderdi ártister – Dáýren Serǵazın, Sanjar Mádı, Asylhan Tólepov, Gúlnaz Jolanova, Ásel Saǵatova, Jandos Aıbasov jáne Azamat Satybaldy, sondaı-aq qazaq ánshisi, kúıshi Ǵalymjan Moldanazar somdaıdy.