Qazaqstanda kıno ındýstrıasy damyp keledi. Biraq prokatqa shyǵyp jatqan otandyq kınolardyń deni komedıa janryndaǵy fılmder. Ulttyq sıpattaǵy tolyqmetrajdy kınolardy bylaı qoıǵanda, kórermenge oı salarlyq dramalar túsirýge de bolar edi. Biraq halyq qarajatyna kıno túsiretin «Qazaqfılm» týyndylarynyń ishinde belgili tulǵalar jaıynda túsirgen fılmderi bolmasa, basym kópshiligi mınıstr tiziminde bar da, eldiń aýzynda joq.

Kınoteatrlardaǵy qazaq kınosynyń bári derlik komedıa. Komedıa arqyly qazaq tildi kórermen jınaı alatynyn dáleldedi. Qazir Gollıvýd fılmderin de qazaqsha dybystaý úrdisi endi. Jetistikterin joqqa shyǵarýǵa bolmaıdy. Osydan on jyl buryn kınoteatrlarda tek oryssha fılmder qoıylatyn. Sebebi kompanıa ıeleriniń bári orystildi, kınony alyp keletin dıstrıbútorlardyń biri Ýkraınada, biri Reseıde edi. Olardyń sapasy kóńil kónshitpeıtin. Keı sújetteri qazaq úshin tym ersi, keıde tipti anaıy. Al qazaq óz mentalıtetine saı dúnıe túsiredi. Deı turǵanmen, mádenı bitim bolmysty emes, qaımaǵy súzilgen kók sútin de esh irkilmeı «mineziń osy» dep betine basqan quny arzan fılmder jeterlik. 

Komedıanyń tabysy men shyǵyny prokatqa baılanysty. Fılm ótimdi bolsa da, sátsiz shyqsa da qarajat tek túsirgen taraptyń qaltasynan shyǵady. Demek, baǵasyn beretin halyq. Ýaqyt ta iriktep, súzgiden ótkizip jatyr. Máselen, ótken jyldary ánshilerdiń kıno túsirýi beleń alǵan, qazir de komedıalyq fılmderge túsip, elge tanylǵan akterlerdiń árqaısysy óz týyndylaryn shyǵaryp, baq synasyp jatyr. Fılmniń ekinshi bóliminiń shyǵýy, árıne, alǵashqysynyń ótimdiligine baılanysty.

2023 jyly prokatqa shyqqan komedıalardyń ishinde eń kóp qarajat jınaǵan fılmder:

 – «Maǵan nazar aýdar» 818 mln 844 myń teńge

–  «Hotá by kınoda 2» 985 mln 085 myń teńge

–  «Bıznes po-kazahskıı v Indıı» 1 mlrd 281 mln 598 myń teńge

Eń tabysty komedıanyń prodússeri Nurlan Qoıanbaevtan búgingi komedıalyq sıpattaǵy kınolarǵa qatysty pikirin suradyq:

– Álemde on-shaqty memleket qana óz kınolaryn óz kınoteatrynan kóredi, ol kınoındýstrıasy damyǵan AQSH, Fransıa, Túrkıa, Koreıa, Indıa, Anglıa. Qalǵan memleketterde ekrandy Gollıvýd kınolary basyp alǵan. Bizdiń elde 30 jyldaı Gollıvýd kınolary basym boldy.

4-5 jyl buryn qazaq komedıasy Gollıvýd kınolarymen kúresti bastap ketti. Kınoteatrlar qazaq komedıasynyń kórermeni bar ekenin túsinip, qazaq kınosyna kóp seans bere bastady. Búgin kınoteatrlarda qazaq kınosyn kórsetý dáýiri bastaldy. Bul tarıhymyzda bolmaǵan úlken jeńis! Buryn kórermenniń  kınoǵa baryp bıletke jaratqan aqshasy tikeleı shet elge, mysalǵa, Gollıvýdqa ketetin, ol shamamen  jylyna 200 mln dollar. Qazaq komedıalarynyń arqasynda qazir jylyna  bıletke jaratatyn aqshanyń teń jartysy, ıaǵnı 100 mln dollar óz elimizde qalyp jatyr.

Árıne, úlken qadam bastap kele jatqan komedıa janryndaǵy kınolardyń arasynda  kóptiń kóńilinen shyqpaı jatqandary da bar. Kósh júre túzeledi. Barlyǵy komedıa túsirip ketti degen oı qalyptasty. Jastarǵa tarıhymyz týraly, motıvasıa beretin kınolar qajet! Komedıa ary qaraı damı beretini anyq. Al drama kınolary óz kúresin qashan bastaıdy? Halyqtyń aqshasyna kıno túsirip jatqan mamandar, kezek sizderde! Tek komedıa kóre beremiz be, deıdi ol.

Al drama túsirý josparyńyzda bar ma degen suraqqa bylaı jaýap berdi:

– 15 jyl KVN-da oınadym. Komedıanyń jaqsy damyp ketýiniń negizgi sebebi – KVN, Jaıdarman oıyndarynyń damyp, shetelge deıin jetýi. Syrt el qazaqtyń kıno, serıaldaryn kórip, maqtaý aıtyp jatady, al óz elimizde úlken aǵalarymyzdan tek syn estımiz. Men ázildiń adamymyn. Meniń baǵytym sol. Drama bizdiń kesirimizden joq bolyp ketpedi. Kıno salasynda bilim alyp, oqyǵan aǵa-inilerimizdiń mindeti bul. Solar únsiz jatqan soń, tek komedıa kórsetilýde.