Áleýmettik jelilerde Almatyda qatty jer silkinisi bolady dep boljaıtyn beınerolıkter  taralyp jatyr. Bul aqparatty taratqan bloger "14 aqpanda planeta Kún energıasynyń bólinýine ushyraıdy" jáne bul jer silkinisin týdyrýy múmkin deıdi. Onyń aıtýynsha, qala turǵyndary 14 aqpannan naýryzdyń basyna deıin jer silkinisine daıyn bolýy kerek.

   Seısmologıalyq baqylaý jáne zertteý ulttyq ǵylymı ortalyǵynyń dırektory Dáýlet Sársenbaev bul aqparatqa túsinikteme berdi.

  — Onyń 14 aqpannan keıin respýblıka aýmaǵynda kúshti jer silkinisi bolady degen boljamyna keletin bolsaq, shynyn aıtqanda, bul blogerler neni meńzep otyrǵanyn bilmeımiz. Olardyń negizderi qandaı? Olar tús kórme me, álde birdeńe paıdalanady ma? Bul qıyn suraq. Shyn máninde, biz kún saıyn 200-den astam parametrdi óńdeımiz, monıtorıń gıdrodınamıkalyq, gıdrohımıalyq, geofızıkalyq, deformasıalyq prosesterdi jáne tipti bıologıalyq baqylaý arqyly júzege asyrylady. Osynyń negizinde biz seısmıkalyq jaǵdaıǵa boljam jasaımyz. Bıyl Almaty oblysynda kúshti joıqyn jer silkinisi kútilmeıdi, — dedi Dáýlet Sársenbaev.

Eske salsaq, 23 qańtarda Almatyda 5,2 baldyq jer silkinisi boldy. Astana ýaqytymen 00 saǵat 09 mın 02 sekýndta almatylyqtar qatty jer silkinisin sezdi. Tótenshe jaǵdaılar departamentiniń málimetinshe, jer asty dúmpýiniń epısentri Almatynyń ońtústik-shyǵysynda, 264 shaqyrym jerde tirkeldi. Magnıtýdasy 6,7 bal. Budan soń turǵyndar qalada taǵy da birneshe jer silkinisi sezilgenin habarlady. Al TJD deregine sáıkes, aldaǵy ýaqytta alapat jer silkinisi bolmaıdy, sondyqtan dúrligýdiń qajeti joq ekenin eskertedi.