Polıseıler kúsh qoldanyp, aqsha bopsalaýmen aınalysqan qylmystyq topty ustady. Bes kúdikti ýaqytsha ustaý ızolátoryna qamaldy. Olarǵa aýyr qylmys jasaǵany úshin múlki tárkilenip, 7 jyldan 12 jylǵa deıin bas bostandyǵynan aıyrý jazasy tónip tur.

"Bir mezgilde Ekibastuz qalasynda jáne Pavlodardyń ózinde pavlodarlyq áriptestermen birge tórt adamdy ustadyq. Besinshi sybaılasy elordada ustaldy. Turǵyn úıge zańsyz kirý arqyly jasalǵan qaraqshylyq shabýyl faktisi boıynsha sotqa deıingi tergep-tekserý bastaldy. Qazirgi tańda barlyq qajetti tergeý áreketteri júrgizilýde", dep atap ótti Qostanaı oblysy PD bastyǵynyń orynbasary Negmet Ismagýlov.

Qańtar aıynyń basynda Qarasý aýylynda medısınalyq betperde kıgen belgisiz tulǵalar jergilikti turǵynnyń úıine kirip, kúsh kórsetip, dene jaraqattaryn saldy. Odan jalpy somasy 650 myń teńge turatyn altyn buıymdary tartyp alynǵan.

"Ustalǵandardyń basqa da osyǵan uqsas qylmystarǵa qatysy bar-joǵy tekserilýde", delingen polısıa habarlamasynda.