Senatorlar jastarǵa teris áser etetin kıberqaýipterdiń ishinde eń qaýiptisi TikTok jelisi dep sanaıdy.

"Búginderi jastarymyz  TikTok-tyń qytaılyq platformasyn paıdalanyp júr. Statısıkaǵa sáıkes, jeli qoldanýshylarynyń shamamen 75 paıyzy 13 pen 24 jas aralyǵyndaǵy jastar. Zertteý nátıjeleri kórsetkendeı, tipti 4-5 jas aralyǵyndaǵy balalar kún saıyn TikTok-ta kem degende 75 mınýt ýaqytyn ótkizedi. Búgingi tańda osy onlaın-platformadaǵy kámeletke tolmaǵandardyń qaýipsizdigi, jeke derekterdiń qaýipsizdigin qamtamasyz etý álemniń barlyq derlik elderiniń bas aýrýyna aınalyp otyr", delingen depýtattyq saýalda.

Senatorlar Eýropa elderi TikTok-ta balalardy zıandy aqparattan qorǵaý tetikteri jumys istemeıtinin anyqtap, oǵan 368 mıllıon dollar, al AQSH kámeletke tolmaǵandardyń derekterin saqtaǵany úshin TikTok-qa 5 mıllıon dollar aıyppul salǵanyn basa aıtady.

"Reseı men Ózbekstan bul áleýmettik jelini óz aýmaǵynda tolyǵymen buǵattap tastaǵan. Óıtkeni, birinshiden, TikTok-qa qumar jas urpaqtyń kórý qabileti kúrt nasharlaǵan. Ekinshiden, ondaǵy keıbir kontent jastar boıynda basqa adamdarǵa degen óshpendilikti arttyryp, qatygez minez-qulyqty qalyptastyrady. Bizdi, ásirese TikTok-taǵy tikeleı efırler mazalaıdy. Ulttyq mentalıtetimizge jat mazmundaǵy vıdeolar jıi kórsetiledi: áıel kıimin kıgen er adam, betine uıatsyz sózder jazyp alǵan qyzdar jáne t. b. Bir sózben aıtqanda, úlgi etýge kelmeıtin, kerisinshe teris qylyqty "juldyzdar" jastardyń qaharmanyna aınalyp barady. Saýatsyz pikirler men saýatsyz sózderge de jas urpaqtyń eti úırene bastaǵan".

Depýtattar Batys elderinde TikTok-ta jasóspirimderge qatysty shekteýler bar ekenin aıtady. Atap aıtqanda, bul jelide kúnine bir saǵattan artyq otyrýǵa bolmaıdy, al 13 jasqa tolmaǵandar úshin ýaqyt shekteýi - 30 mınýt. Qytaıdyń ózinde jasóspirimderge TikTok-ty kúnine 40 mınýttan artyq paıdalanýǵa ruqsat etilmeıdi.

"Ókinishke qaraı, bizdiń elde mundaı shekteýler joq", deıdi senatorlar.

Osyǵan baılanysty olar Premer-mınıstrden TikTok-qa Qazaqstan zańdarynyń oryndalýyn saqtaýdy jáne qosymshanyń jumys algorıtmderin Batys elderindegideı etip qaıta jasaqtaýdy mindetteýdi suraıdy.