Senatordyń sózinshe, olardyń densaýlyǵy men ómirine qaýip tóngende, qandaı áreket etý kerek ekenin oqytý kerek. 

“TJ qyzmetteri múgedektigi bar adamdardy olarǵa arnalǵan uıymdarda sońǵy ret 10 jyl buryn oqytqan kórinedi. Ekinshiden, múgedekterdi qutqarý jáne evakýasıa máselesi bar. Zertteý kórsetip otyrǵandaı, ákimdikterde qozǵalysy az azamattardy tabý kartasy joq, al qutqarýshylar múgedek adamdardy evakýasıalaý barysynda olarmen qarym-qatynas jasaý daǵdysyn bilmeıdi.

Úshinshiden, múmkindigi shekteýli azamattar kóbinese baspana jáne halyqty ýaqytsha ornalastyrý oryndaryna qol jetkize almaıdy. Ásirese, daǵdarys kezinde jıi beleń alatyn qylmys pen zorlyq-zombylyq týraly aıtpaǵannyń ózinde jaǵdaı osyndaı. Mundaı jaǵdaıda múgedekter, ásirese, áıelder men balalar eń aýyr jaǵdaıǵa dýshar bolady”, – dedi ol.

Lázzat Qaltaeva birneshe usynys aıtty. 

“Osy másele boıynsha óz oıymdy ortaǵa sala otyryp, nazar aýdarýdy usynamyn: múgedek adamdar uıymdarynan sarapshylardy qatystyryp jáne erekshe qajettilikterin esepke ala otyryp halyqty oqytý, evakýasıalaý, ornalastyrý jáne áleýmettik qamsyzdandyrý jónindegi josparlar ázirleý kerek. Múgedektigi bar adamdardyń erekshe qajettiligine sáıkes keletin baspanalardy jobalaý jáne jaraqtandyrý kerek. Zamanaýı ádister men tehnologıany paıdalana otyryp, ártúrli naýqasy bar adamdarǵa arnalǵan aqparat berý jáne oqytýdyń arnaıy baǵdarlamasyn ázirleý kerek. Tótenshe jaǵdaı kezinde olardy izdeý jáne naqty kómek kórsetý úshin qozǵalysy az azamattardyń biryńǵaı derek qoryn qurý kerek", - dedi depýtat.