«Kompanıa búginnen bastap ereýildi zańsyz dep taný týraly sot sheshimin negizge ala otyryp, óndiristik qajettilikke baılanysty 50 qyzmetkermen eńbek shartyn buzatynyn habarlaýǵa májbúr. Paıda bolǵan bos oryndarǵa jumysqa ornalasýǵa kezekte turǵan azamattardyń arasynan qabyldaımyz. Bul rette jumysqa qabyldaý isi bos laýazymdarǵa qoıylatyn biliktilik talaptaryna sáıkes júzege asyrylady. Bul tásil eńbek zańnamasyna tolyǵymen sáıkes keledi», - delingen habarda.
     Habarda atap ótilgendeı, «jumysqa qabyldaý prosesi aıaqtalǵansha jumystan bosatylǵan qyzmetkerlerdiń kelisim komısıasy arqyly jumysqa qaıta oralýyna múmkindigi bar».
«Osyndaı múmkindik bar kezde, zańsyz ereýilge qatysýshylardyń barlyǵyn óz jumystaryna oralǵan áriptesterinen úlgi alýǵa shaqyramyz. Bul proses jospar boıynsha jalǵasady. Biz jumysqa ornalasýǵa nıetti jańa úmitkerlerdiń tolyq tizimin anyqtaǵannan keıin, zańsyz ereýildi toqtatqysy kelmegen basqa jumysshylarmen eńbek shartyn buzatyn bolamyz. Olardyń ornyna jumysqa óńirdegi jumyssyzdardyń arasynan qabyldaımyz», - delingen kompanıa málimdemesinde.
      Eske salsaq, buǵan deıin Mańǵystaý oblysynda «West Oil Software» JSHS qyzmetkerleriniń ereýilge shyǵýy zańsyz dep tanylǵan bolatyn, al kompanıa osy jaǵdaıdan keıin uńǵymalarda apat bolý qaýpi týyndaǵanyn málimdedi.