Qazaqstandyqtar tar dárigerlerge terapevttiń joldamasynsyz bara alady. Densaýlyq saqtaý mınıstrligi medısınalyq kómek kórsetý standarttaryna tıisti ózgerister engizdi.

Ózgeristerge sáıkes, naýryz aıynan bastap josparly emdeýge jatqyzýǵa arnalǵan taldaýlar tizbesin 42 zertteýge qysqartý, sondaı-aq olardyń qoldanylý merzimin 10 kúnnen 14 kúnge deıin jáne 1 aıdan 3 aıǵa deıin ulǵaıtý josparlanýda.

Sáýir aıynan bastap beıindi mamandarǵa tikeleı júginý tásilderi jetildiriletin bolady. Naýqas kelesi jaǵdaılarda jalpy praktıka dárigeriniń joldamasynsyz beıindi mamandarǵa júgine alady:

• shuǵyl jaǵdaılar men jaraqattar, sonyń ishinde oftalmologıalyq, otorınolarıngologıalyq jáne basqa da jaraqattar;
• shuǵyl jáne josparly stomatologıalyq kómek kórsetý;
• dermatovenerologıalyq beıindegi aýrýlar;
• tirkelgen jeri boıynsha akýsher-gınekolog pen psıhologtyń qabyldaýy;
• onkolog jáne onkogematologtyń qabyldaýy;
• dıspanserlik esepte turǵan pasıentter úshin kardıolog, endokrınolog, oftalmolog, nevropatolog, hırýrg qabyldaýlary;
• beıindi mamanǵa ony taǵaıyndaý boıynsha qaıta qabyldaý;
• jastar densaýlyq ortalyqtarynda mamandar qabyldaý;
• jyljymaly medısınalyq keshenderdiń jáne basqa da mobıldi qyzmetterdiń qyzmetterin kórsetý kezinde.

"Sáýir aıynan bastap dınamıkalyq baqylaý tártibi jáne jalpy praktıka dárigeri men beıindi mamandardyń birlesken jumys algorıtmi qaıta qaralady, bul kópsalaly tásildi qamtamasyz etedi. Osy jumys sheńberinde zertteýlerdi júrgizýdiń eseligi men kólemi árbir pasıent úshin jeke - jeke anyqtalatyn bolady", - dep habarlady Densaýlyq saqtaý mınıstrligi.