Adam quqyqtaryn qorǵaý búrosynda ótken jıynǵa bir top qoǵam belsendileri qatysqan. Olardyń qatarynda saıasatker Rysbek Sársenbaıuly, Áıgerim Tileýjannyń advokaty Aınara Aıdarhanova, quqyq qorǵaýshy Marjan Aspandıarova men "saıası tutqyn", jýrnalıs Dýman Muhammedkárimniń ákesi Almas Tilepovter bar. 

Jıyn barysynda Rysbek Sársenbaıuly prezıdent Qasym-Jomart Toqaevqa arnalǵan úndeýdi oqydy. Ol "qandy Qańtardan" keıin naǵyz jaýapty adamdar jazalanbaı, qarapaıym halyq jazalanǵanyn aıta otyryp,  Úndeýde Qańtar kezinde Almaty «áýejaıyn basyp almaq boldy» degen aıyppen tórt jylǵa sottalǵan saıası belsendi Áıgerim Tileýjan «ekstremızmdi qarjylandyrý» jáne «tyıym salynǵan uıym jumysyna aralasý» baptary boıynsha isti bolyp, qazir soty ótip jatqan táýelsiz jýrnalıs Dýman Muhammedkárimderdi  bosatýdy talap etti. 

Sondaı-aq bureau.kz málimetinshe, 6 naýryzda advokaty Aınara Aıdarhanova túrmede janjal bolǵanyn, soǵan baılanysty Áıgerim Tileýjannyń ústinen «Densaýlyqqa qasaqana aýyrlyǵy ortasha zıan keltirý» (107-bap) baby boıynsha is qozǵalǵanyn habarlaǵan. 

Búgin, 14 naýryzda advokaty Áıgerim Tileýjannyń ústinen aryz jazǵan adam ekspertızadan ótýden bas tartqanyn aıtty. Qylmystyq is qozǵaýǵa jedel járdem qyzmetkeriniń anyqtamasy sebep bolǵan. Anyqtamada jábirlenýshiniń «saýsaǵy synǵany» jazylǵan. Al Tileýjan advokatqa túrme kamerasynda sózge kelip qalǵanyn, eshkimge qol kótermegenin aıtqan. 

Baspasóz jıynyna qatysqan Qazaqstandaǵy parlamentarızmdi damytý qorynyń prezıdenti Záýresh Battalova muny saıası tapsyrys dep sanaıdy. Ol depýtattardy, adam quqyǵyn qorǵaý uıymdaryn belsendiniń jaǵdaıyna nazar aýdarýǵa shaqyrdy. 

Belsendi Álnur İlıashev ta Áıgerim Tileýjanǵa qysym jasalyp jatyr dep esepteıdi. Ol belsendige baılanysty ashylǵan is ádeıi uıymdastyrylǵan dep esepteıdi. 

Advokat Aınara Aıdarhanovanyń aıtýynsha, bul is Tileýjannyń negizgi isi boıynsha Joǵarǵy sotqa shaǵymdanǵan kezinde kedergi bolady.

– Onyń ústinen aryzdanǵan adam Jaýǵashty túrmesine aryz jazyp úlgermesten qylmystyq is qozǵalyp, belsendi túrde tergeý bastalyp ketken. Olardyń mundaı jyldamdyǵy bizdi tańǵaldyrdy. Muny Áıgerimniń jazasyn óteý merzimin uzartý maqsatynda ádeıi jasalǵan dep oılaımyz. Bul onyń negizgi isi boıynsha kasasıalyq aryzdy qaraýǵa kedergi keltiredi, – dedi advokat baspasóz jıynynda. 

Belsendi, jýrnalıs, aýdarmashy Áıgerim Tileýjan byltyr 2022 jylǵy Qandy Qańtar kezinde «Almaty áýejaıyn basyp almaq boldy» dep aıyptalyp, 4 jylǵa sottalǵan. Ol ózine taǵylǵan aıyppen kelispeı, buny saıası tapsyrys dep baǵalaǵan.