Toksıkoz bolyp, úıimizdiń berekesin aldyń dep uratyn

“Otaý qurǵanymyzǵa 12 jyl boldy. 12 jylda 4 balaly boldyq. Oqyǵan, toqyǵan azamatqa turmysqa shyqqanyma qýanǵan edim. Úılengenimizge 1 aı tolǵanda qol kóterip bastady. Sondaǵy sebebi “toksıkoz bolyp, úıimizdiń berekesin aldyń” deıtin. Keıinnen bolmashy túrli sebepterdi aıtyp, urýyn údete túsýdi. Alǵashynda turmysqa jańa shyqtym ǵoı dep qaldym. Keıinnen aıaǵym aýyr ǵoı dep, sosyn uıat bolar dep júrgenimde 12 jyl ótipti. 12 jylda tolassyz qol kóterýlerinen qabyrǵam, murnym synyp, basymnan gematoma bolyp aýrýhanalarǵa jatyp shyqtym. Kishi eki qyzym ákelerinen qoryqqannan tilderi shyqpaı qaldy. Al uldarym óte agressıvnyı bolyp ósip keledi. Oraıy kelse, mańaıyndaǵy adamdardy sabap jiberýge daıyn. Ózim tuqymymda joq epılepsıa aýrýyna shaldyqtym. Saltanattyń óliminen keıin 4 balamnyń taǵdyryn oılap, ketýge sheshim qabyldadym”,-deıdi “JanSaıa” daǵdarys ortalyǵyn panalaǵan N.esimdi azamatsha.

Maǵan ǵana emes, jeńgesimen, apasyna da qol kóteretin

Men kúıeýimmen 3 jyl turdym. 1 ulymyz bar. Kúıeýim shańyraq kótergen soń 6 aıdan keıin “kınoǵa óz pikirińdi aıttyń” dep qol kóterip bastady. Al men jaı ǵana birlesip kórgen kınomyz týraly oıymdy aıtqan edim. Túk túsinbeı qaldym. Ózim psıholog mamandyǵyn bitirgenmin. Kúıeýim de dáriger. Osy urǵannan keıin qaıtalaı berdi. Meniń ár kúnim jylaýmen óte bastady. Psıholog retinde agresıasynyń sebebi ne ekenin anyqtaǵym keldi. Sóıtsem eneme degen ashýdan týǵan sıaqty. Enem óte erkin adam, ári erke. Atam da erkeletip, bar mahabbatyn berip otyrady. Olardy týystar Qyz Jibek pen Tólegen deıdi. Al maǵan: “sen meniń mamam sekildi yrbyq bolmaýyń kerek, mamama uqsap bara jatyrsyń” dep jıi ashýmen aıtatyn. Árdaıym “men erkekpin” dep keýdesin uratyn. Bir kúni qatty soqqydan esimnen tanyp qaldym. 1 apta aýrýhanada jatyp, sotresenıe aldym. Onda da atam men enemniń sózin tyńdap ketpeı qalǵan edim, týys jeńgemizdiń úıine qonaqqa barǵanda bárine kózim jetti. Kóz aldymda jeńgesimen kerisip qalyp, uryp, shashynan súıredi. Jeńgemiz jylap otyryp, stýdent kezinde apasyn da “jata bermeı tirlik isteseńshi” degen sózinen keıin basynan uryp tastaǵanyn aıtty. Sonda da soǵa bergenge ábden etim ólip qalǵan eken. Ketpeı júrgenimde Saltanattyń oqıǵasynan keıin bir túnde zattarymdy jınap, daǵdarys ortalyǵyna keldim,- deıdi Q. esimdi kelinshek.

Enem ekeýi qosylyp uratyn

Analar úıinde balammen turyp jatqanyma jarty jyl boldy. Ózimniń aıaǵym aýyr. Turmys qurǵan soń 2-3 aptadan keıin qol kóterip bastady. Shydap, úndemeı júrdim. Balam da tolassyz taıaq jeýlerden dúnıege búırek jetkiliksizdigimen keldi. Sol dıagnozdy estigennen saý bala týyp berýge qaýqaryń jetpedi dep urýyn údete tústi. Enem de aıtaqtap, aýrý balasyn qushaqtap otyra beredi, úı jylan jalaǵandaı taza emes dep aıtaqtap, sabatqyzatyn. Keıde qosylyp uratyn. Qalaı shydaǵanymdy bilmeımin, qazir oılap otyrsam, tozaqta bolǵanmen birdeı kúı keshken ekenmin. Qazir ýzıstter ishtegi balanyń densaýlyǵy jaqsy ekenin aıtýda. Taǵy qalsam, ekinshi balam da aýrý bolar edi. Saltanattyń oqıǵasy da ómirime úlgi boldy. Onyń mısıasy qazaq áıelderin ólimnen saqtaý bolǵan sıaqty,-dep sózin túıindedi A. esimdi jas ana.

Aqgúl Aıdarbekqyzy