Jýaly aýdanynda úzdiksiz 27 jyl boıy bas dárigerlik qyzmetti abyroımen atqarǵan Rýslan Moldabekuly (Raıysuly) Jýaly aýdanyndaǵy Yntymaq aýylynda dúnıege kelgen. Ákesiniń inisi Moldabek asyrap alǵandyqtan, sol kisiniń tegine ótken.

Ol Almaty memlekettik medısınalyq ınstıtýtynyń pedıatrıa fakúltetinde oqyp, eńbek jolyn Almaty qalasyndaǵy týberkýlez ǵylymı zertteý ınstıtýtynyń hırýrgıa bóliminde ftızıohırýrg mamandyǵy boıynsha bastaǵan. 1981-1982 jyldar aralyǵynda Qordaı aýdandyq týberkýlez aýrýhanasynda dáriger ftızıatr bolyp eńbek etedi. 1982 jyldyń 6 mamyr aıynan bastap 2010 jylǵa deıin alǵashynda oblystyq «Teris-Ashybulaq» týberkýlez sanatorııinde, keıin aýdandyq týberkýlez aýrýhanasynda bas dárigerlik qyzmetti atqarǵan.

Dárigerge qurmetpen qoıylǵan memorıaldy taqtanyń ashylý saltanatyna qatysqan Jýaly aýdandyq máslıhatynyń tóraǵasy Zıadhan Búrlibaev, aýdannyń qurmetti azamaty, akademık Sábıt Dúısebaev, aýdandyq qoǵamdyq keńes tóraǵasy Ábdikerim Úrkimbaev, aýdan ákiminiń orynbasary Anar Ahmetova sóz sóıledi. 2022 jyly dúnıeden ótken Rýslan Raıymbektiń áriptesteri men týysqandary estelikterin aıtty.