Sot materıaldaryna sáıkes, komandır jas sarbazdardy qatarǵa turǵyzyp, famılıasyn bile me degen syltaýmen olardyń biriniń basynan aǵash dýbınkamen urǵan. Alaıda sarbaz komandırdiń famılıasyn durys aıtpaǵandyqtan taǵy da birneshe ret soqqy alǵan. Týra osyndaı soqqyny taǵy birneshe sarbaz alǵan. 

Taǵy bir epızod boıynsha komandır jasaqtaýǵa keshigip kelgen sarbazdy betinen judyryqpen urǵany anyqtalǵan. Keıinirek ol qatardaǵy jaýynger jattyǵý kezinde balaǵat sózder aıtty dep onyń basynan oryndyqpen birneshe ret urǵan. Qatty soqqydan soń jaýynger basyn ustap, qorǵanbaq bolǵanda komandır ony tepkilep, judyryqtaı jónelgen. Budan ózge epızodta áskerı qyzmetshi polıgonda taǵy bir sarbazdy judyryqpen uryp, tisiniń bir bóligin syndyrǵany aıtylady.

Tergeý kezinde jábirlenýshi dep tanylǵan 5 sarbaz qyzmettik ókilettigin asyra paıdalandy dep aıyptalǵan komandırge keshirim berip, taraptardyń tatýlasýy týraly aryz jazǵan. Sotta aıyptalýshy óz kinásin moıyndaıtynyn jáne jábirlenýshilermen tatýlasýǵa kelisetinin aıtqan.

Aqtóbe garnızonynyń áskerı soty taraptardyń tatýlasýyna baılanysty qylmystyq isti qysqartty.

Sot qaýlysy áli zańdy kúshine engen joq.