Ońtústik Koreıa Qazaqstannyń CPC Blend dep atalatyn munaıyn satyp alýdy toqtatty. Olardyń mundaı sheshim qabyldaýyna ne sebep deseńiz, koreıalyqtar az kúkirtti munaıdy satyp alý Qyzyl teńizdegi hýsıtterdiń shabýyly aıasynda tym qymbat jáne tıimsiz dep otyr. 

Buǵan deıin Ońtústik Koreıa CPC Blend munaıynyń turaqty satyp alýshysy boldy.

Novorossıısk Qara teńiz portynan CPC Blend sortynyń munaıy Sýes kanaly arqyly Ońtústik Koreıa porttaryna jetkiziledi. Aqpan aıynda Qyzyl teńiz arqyly logıstıkadaǵy qıyndyqtarǵa baılanysty birde-bir partıa jetkizilmegen. Al jetkizý quny ósken.

Ońtústik Koreıanyń iri munaı óńdeý kompanıasy SK Innovation jáne onyń kóliktik enshiles kompanıasy SK Shipping qazaqstandyq munaıdy jetkizýge arnalǵan CPC Blend logıstıkalyq shyǵyndarynyń kúrt kóbeıgenin aıtty. Sondyqtan Seýlde ornalasqan Koreı munaı qaýymdastyǵynyń sarapshylary munaı óńdeý zaýyttary bolashaqta CPC Blend sortynyń shıki munaıyn satyp alýdy aıtarlyqtaı azaıtady dep esepteıdi.