Atyraý oblysynyń ákimi Serik Shápkenovtiń aıtýynsha, 1993-1994 jyldary Jaıyq ózenine sý shamadan tys kóp kelgen. Bıyl da mol sý keletini boljanyp otyr. 

Óńirde sý tasqynyn toqtatýdyń tásilin biletin ardagerler az emes. Oblys ákimimen kezdesýde ardagerler Nurpeıis Maqashev, Murat Óteshov, Ǵabbas Hısmetýllın, Bısen Qýanov, Násipqalı Qonasov, Saǵynbaı Shotpaqov, Edige Sabyrov, Anatolıı Jmyhov, Roman Olıvko tasqyn sýdy tejeýge qatysty tájirıbe bólisti.

Olar birqatar usynystaryn aıtty. 

Birinshiden, geodezısterdiń keńesimen Baltyq júıesine sáıkes jer bederin eskerip, bógetter men jaǵalaý qorǵanysyn salý qajet.

Ekinshiden, sý kelgen kezde balyqtyń jappaı qyrylýyn boldyrmaý úshin epıdemıologtar men balyq sharýashylyǵy salasynyń mamandarynyń keńesine júgingen jón. 

Úshinshiden, topografıalyq sýretteý júrgizip, arnaıy kartany daıyndaýdy qolǵa alý kerek.

Bul úshin Inder, Mahambet aýdandary men Atyraý qalasynyń jaǵalaý aımaǵyn qosyp, oǵan tehnıka bekitilýge tıis.

Tórtinshiden, óńirdegi Naryn, Baqsaı, Sokolov, Saryózek kanaldarynyń tabanyn tazartyp, ózen sýynyń jolyn ashýdyń mańyzy zor.