Mahambet aýdanyndaǵy Jaıyq ózeniniń jaǵasyna bóget turǵyzý úshin topyraq qazý kezinde adamnyń bas súıeginiń 12 fragmenti jáne dene súıekteriniń 26 fragmenti tabyldy. 

Oqıǵa ornyna kelgen quzyretti organdardyń qyzmetkerleri bul faktini aqparatty esepke alý kitabyna tirkep, tergeýge deıingi áreketterdi bastap ketti. Aldaǵy ýaqytta tabylǵan súıekter qaıta jerlenedi.

«Eski Saraıshyq úshin arheologıalyq qazba kezinde adam súıeginiń tabylýy jańalyq emes. Óıtkeni, ortaǵasyrlyq Saraıshyqta úlken qorym bar ekeni barshamyzǵa belgili. Arheologıalyq zertteý barysynda da, tipti eski Saraıshyq aýyly ishinde túrli jumystar barysynda da adam súıekteri jıi kezdesip jatady. Al, búgingideı, elde sý tasqynynan qorǵaý maqsatynda jasalyp jatqan úlken jumystar kezinde adam súıekteriniń shyǵýy zańdylyq. Ádette, mundaı habar jetken boıda mamandar óz jumystaryn atqaryp, olardy zerdelep, jer qoınyna salt –dástúrimiz boınsha tapsyrady», - dedi «Saraıshyq» mýzeı-qoryǵynyń dırektory Muhtar Ábilseıit.

Aıta ketý kerek, buǵan deıin Atyraý oblysynda tabıǵı sıpattaǵy tótenshe jaǵdaı jarıalanǵan bolatyn. Qazirgi tańda Jaıyq boıynda ornalasqan Mahambet, Inder aýdandarynda jáne Atyraý qalasyna bóget turǵyzý jumystary qarqyndy júrip jatyr.