BQO ákiminiń orynbasary Qalıar Aıtmuhambetovtiń aıtýynsha, qazirgi tańda qaýip tónip turǵan oblys ortalyǵy jáne Jaıyq ózeni boıynda ornalasqan Aqjaıyq, Bórli, Báıterek, Terekti aýdandarynyń 90-ǵa jýyq eldi mekeninde sý tasqynynan qorǵaý jumystary júrgizilip jatyr.

«Kúni búgin uzyndyǵy 43 kılometrdeı bolatyn bıiktigi 1-2,5 metr bógetter turǵyzylyp jatyr. Atalǵan jumystarǵa 250-den astam tehnıka men 2,5 myńǵa jýyq adam jumyldyryldy. Jumystar jalǵasýda», - dedi Q.Aıtmuhambetov.

«Qazgıdromet» RMK BQO fılalynyń 11 sáýir saǵat 08.00-degi málimeti boıynsha Jaıyq ózeniniń deńgeıi Oral qalasy tusynda táýligine 10 santımetrge joǵarylady. Sóıtip 728 santımetrge (qaýipti shegi – 850 sm) jetti. Sondaı-aq Ianvarsev gıdrobeketinde 787 (+15, qaýipti shegi – 1 250 sm), Kóshimde 688 (+13, 850 sm) jáne Taıpaqta 410 (+20, 850 sm) santımetrge jetti.