Májilis depýtaty Erbolat Satybaldın Jezqazǵan mys óndirý kásipornyna áıgili ǵalym, geolog Qanysh Sátbaevtyń atyn berý jóninde bastama kóterdi.

– Bıyl qazaq dalasynyń uly perzenti Qanysh Imantaıuly Sátbaevtyń týǵanyna 125 jyl tolyp otyr. Qanysh Sátbaev tuńǵysh kásibı taý-ken ınjeneri, ǵalym, geolog, tuńǵysh akademık. Sondyqtan, uly ǵalymnyń esimi qazaq halqynyń tarıhynda altyn áriptermen jazylǵan. Oı-órisi keń, ǵylymı qyzmetti sheber uıymdastyrǵan adam retinde Sátbaevtyń ulylyǵy elimizdiń ıntelektýaly elimizdiń ǵylymı damýyna baǵyt berdi. Elimizdiń búgingi ınovasıalyq jáne ǵylymı áleýetiniń irgetasyn qalady, – deıdi ol.

Erbolat Satybaldın ǵalymnyń 1927 jyly jas maman ınjener retinde Qarsaqbaı kenishinde bastaǵanyn, keıin úlken Jezqazǵannyń ashylýyna, Qazaqstanda tústi metalýrgıa óndirisine bastaý bolǵanyn aıtady. 

– Elimizdiń túrli-tústi metalýrgıasynyń flagmanyna aınalǵan Jezqazǵan mys óndirý kásipornyna ataýly mereıtoıǵa oraı akademıktiń atyn berý tarıhı ádildik bolar edi dep oılaımyn. Táýelsiz Qazaqstannyń ónerkásibin órkendetýge úles qosyp, osyndaı óndiris alabynyń alǵashqy uıymdastyrýshysy bolǵan Qanysh Sátbaevty umytpaý kerek, – deıdi Satybaldın.