Senator Sovetbek Medebaev zańda qandastardy tirkeý máselesin jetildirý jaǵy qarastyrylǵanyn aıtady.

- Qandas mártebesin jáne Qazaqstan azamattyǵyn jeńildetilgen tártippen alýǵa úmitkerlerdiń jeke basyn kýálandyratyn nemese ultyn rastaıtyn basqa da qujattarda tıisti jazba bolmaǵan jaǵdaılarda, ony aıqyndaý rásimin jetildirýge baǵyttalǵan túzetýler usynylady. Atap aıtqanda, Eńbek jáne halyqty áleýmettik qorǵaý mınıstrligine ulty qazaq ekenin aıqyndaý erejesin ázirleý jáne bekitý jónindegi ókilettigi bekitiledi, - dedi senator.

Al zańnyń negizgi qamtıtyn máselelerine:

• Kámeletke tolmaǵandarǵa jynystyq zorlyq kórsetken qylmystar úshin sottalǵan sheteldikterge Qazaqstan Respýblıkasyna kirýdi jáne eldiń azamattyǵyn alýdy shekteý;
• Ekstremıstik nemese terorıstik áreketterge qatysy bar sheteldikterdiń elge kirýine tyıym salý;
• Kóshi-qon salasyndaǵy zańnamanyń saqtalýyna memlekettik baqylaýdy júzege asyrý tártibin aıqyndaý bolyp tabylady. Máselen, aýmaqtyq ishki ister organdary júzege asyratyn sheteldik jumys kúshin paıdalanatyn zańdy, jeke tulǵalardy tekserý tártibi zańnamalyq deńgeıde bekitiledi;
• Eger jeke basyn kýálandyratyn qujattardy jáne qoldaný merzimi ótken basqa qujattardy uzartý nemese aýystyrý múmkindigi bolmasa, olardy tótenshe jaǵdaılarda paıdalaný máselesin retteý. Mundaı qujattar qoldaný merzimine qaramastan jaramdy dep tanylatyn bolady;
• Qos azamattyqty bolǵyzbaý maqsatynda Qazaqstan azamattyǵyn alǵannan keıin basqa memlekettiń azamattyǵyn rastaıtyn qujattardy paıdalanǵan jaǵdaıda Qazaqstan Respýblıkasynyń azamattyǵyn joǵaltýdyń jańa negizi engiziledi.

Aıta ketsek, qoldanystaǵy zańnamada shet memlekettiń azamattyǵyn alǵany úshin ǵana Qazaqstan azamattyǵynan aıyrý kózdelgen.

-Qos azamattyqty bolǵyzbaý maqsatynda Qazaqstan azamattyǵyn alǵannan keıin basqa memlekettiń azamattyǵyn rastaıtyn qujattardy paıdalanǵan jaǵdaıda Qazaqstan Respýblıkasynyń azamattyǵyn joǵaltýdyń jańa negizi engiziledi, - dedi Sovetbek Medebaev.

Senatta «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.