ASTANA. 9 qazan. Búgin Qazaq handyǵynyń 550 jyldyǵy sheńberinde Tarazdaǵy «Taraz Arena» sport kesheninde qazaq kúresinen İİİ halyqaralyq «Eýrazıa barysy» týrnıri ótti. Segiz memlekettiń balýandary synǵa túsken dúbirli dodada Qazaqstan quramasy top jaryp, jarystyń eki dúrkin jeńimpazy atandy. Bizdiń jigitter fınalda Ózbekstan quramasynan 5:2 esebimen basym tústi. Bul týraly egemen.kz habarlady.
Jerebe boıynsha alǵash bolyp kilemge Grýzıa men Mońǵolıa quramalary kóterildi. Ótken jylǵy saıystyń bas júldesin enshilegen mońǵol balýandarynan bıyl da joǵary nátıje kútkender az bolǵan joq. Tartysty ótken beldesýlerde qos qurama birin biri kezektesip jeńip otyrdy. Nátıjesinde kezdesý taǵdyry asa aýyr salmaqta (+100 kg) synǵa túsken balýandardyń beldesýinde sheshildi. Bul synda Beka Berdzeneshvılı qarsylasy Davaanám Altangerelden basym túsip, Grýzıa quramasy 4:3 esebimen jeńiske jetti.
Al birinshi aınalymda Polshamen kezdesken Qazaqstan quramasy 5:2 esebimen jeńiske jetti. Jerlesterimizden Marat Nıgmatollaev (55 kg), Baǵdáýlet Sábıtov (66 kg), Maqsat Mázibaev (82 kg), Nurym Sálimgereev jáne Beıbit Ystybaev qarsylastarynan aılasyn asyrsa, Rınat Mahmutov (74 kg) pen Bekzat Ahmetbekov (90 kg) jeńiliske ushyrady.
Odan bólek, saıystyń osy satysynda Ózbekstan Qyrǵyzstannan – 5:2, al Reseı Túrkıadan 5:1 esebimen basym tústi.
Jartylaı fınalda Grýzıa Ózbekstan quramasymen kúsh synasty. Qap taýynyń eteginen kelgen balýandar byltyr qola júldege qol jetkizgeni esimizde. Degenmen, bıyl ózbek balýandarynyń tyńǵylyqty daıyndyqpen kelgeni anyq baıqaldy. Ár beldesýde saýatty ádis jasaǵan olar grýzınderdi 5:2 esebimen tize búktirip, fınalǵa shyqty.
Al ekinshi jartylaı fınaldyq jupty quraǵan Qazaqstan men Reseı quramalary arasyndaǵy aıqas bizdiń paıdamyzǵa 6:1 esebimen aıaqtaldy. Bul kezdesýde komandamyz ekinshi qurammen shyqty. Jattyqtyrýshylardyń sheshimimen Reseıge qarsy Aıdos Seıpiluly (55 kg), Ǵalymjan Abdrahmanov (66 kg), Aıdos Ǵalymov (74 kg), Suńǵat Zakarıev (82 kg), Asyl Bármenov (90 kg), Muhıt Tursynov (100 kg) jáne Aıbek Nuǵymarov (+100 kg) beldesti.
Úshinshi orynǵa talasta Grýzıa Reseıdi 6:1 esebimen jeńip, qatarynan ekinshi ret qola «Taıqazandy» ıemdendi.
Fınalda Qazaqstan jartylaı fınaldaǵy qurammen synǵa tústi. Nátıjesinde balýandarymyz Ózbekstan quramasyn 5:2 esebimen jeńip, týrnırdiń eki dúrkin jeńimpazdary atandy. Bul synda ulttyq quramadan Asyl Bármenov pen Aıbek Nuǵymarov qarsylastaryna ese jibergenin aıta keteıik.
Bıylǵy týrnırdiń jalpy júlde qory 18 800 000 teńgeni qurady. Atap aıtqanda, 1-orynǵa – 9 400 000, 2-orynǵa – 5 640 000 jáne 3-orynǵa 3 760 000 teńge taǵaıyndaldy. Taǵy bir eskerte ketetin jaıt, segiz saǵatqa sozylǵan saıysty otandyq «Qazaqstan» ulttyq telearnasy men Reseıdiń «Boes» telearnasy tikeleı efırde kórsetti. Sondaı-aq, kúlli túrki álemine taraıtyn Túrkıanyń «TRT Avaz» telearnasy da apaıtós balýandardyń aıqasyn tikeleı kórsetip, túbi bir týys halyqtardyń nazaryn Qazaqstanǵa aýdardy.