Májilis depýtaty eldegi sý tasqyny men ekologıalyq máselelerge qatysty saýal tastady. Depýtat sýdy ustap turatyn jasandy materıaldan jasalǵan bógetterdiń qorshaǵan ortanyń lastanýyna ákep soqtyratynyna basa nazar aýdardy.

“Endi sý tartyldy, eger biz bul kenep qapshyqtardy tastap, olardyń barlyǵyn jınamasaq ekologıalyq apatqa tap bolamyz. Sondaı-aq jyralardan shyqqan sý qoqystardy, qaldyqtardy, janýarlar men qustardyń ólekselerin shaıyp ketken. Terezeni ashyp temeki laqtyramyz, túkiremiz, stadıonǵa nemese kınoteatrǵa barsaq ta iship-jegenimiz sonda qalady. Oıymyzdy ózgertý kerek. Biz tazalyqty jalpy qundylyq retinde, qajet bolsa, tártip retinde de dáripteýimiz kerek”, – dedi Maqsat Tolyqbaı.

Depýtat másele der kezinde sheshimin tappaǵan jaǵdaıda indet taraýy múmkin ekenin de aıtty. Ol qoǵamdyq oryndar men qorshaǵan ortanyń tazalyǵyn saqtaý, ósimdikterdi kútip-baptaý arnaıy qyzmetkerlerdiń ǵana emes, barlyq azamattyń mindeti ekenin atap ótti.

Maqsat Tolyqbaı Qazaqstan mektepterine ekologıa boıynsha jeke pán engizýdi usyndy.

“Bilim mınıstrligi mektep oqýshylary arasynda "Ekologıalyq sana" atty tárbıe saǵattaryn ótkizýdi bastaýy kerek”, – deıdi depýtat.