Aqyn áleýmettik jelidegi paraqshasynda jazba jarıalap, úsh jarym aıǵa sozylǵan «Elikti park» soty oń nátıjemen aıaqtalǵanyn jetkizdi.

"Úsh jarym aıǵa sozylǵan «Elikti park» soty búgin aıaqtaldy. Aqmola oblysy, Zerendi aýdandyq sotynyń sýdıasy Aıda Karımova tóraǵalyq etken sot prosesi jábirlenýshi taraptyń talabyn oń nátıjege sheshti. «Elikti parktyń» ıesi sottalǵan joq. Onyń jıeni sottaldy. Sebebi, sol ýaqytta onyń bıznesi ýaqytsha sol jıeniniń atyna jazylǵan eken. Sot Álıhan syrǵanaǵan kúni de, odan bir apta keıin zardap shekken Dınara Mýksýlova men Birimjanovalar syrǵanaǵan ýaqytta da eshqandaı qaýipsizdik erejeleri saqtalmaǵanyn dáleldep, sottalýshyǵa qaýipsizdigi eń tómen kolonıaǵa tórt jylǵa bas bostandyǵynan aıyrýǵa úkim shyǵardy», – dep jazady.

Sondaı-aq aqyn jábirlenýshi tarap balasyn sottalýshy tarap uıymdasqan túrde taýda bir jarym saǵat tyǵyp tastaǵanyn dáleldeı almaǵanyn aıtady.

«Taýda balamnyń jatqanyn kórgen kýágerlerdiń sózderi ártúrli shyqty. Kóbi bir-birin tanıtyn adamdar ǵoı. Kamera bolmaǵan soń dáleldeý qıyn eken. Onyń ústine sottalýshy taraptyń jaldap alǵan eki advokaty da ákki, zań salasynan bilimderi tereń jigitter eken. Esh dálelderi joq bolsa da ár sotta «búırekten sıraq shyǵaryp-aq» baqty. Sot moraldyq shyǵynymyzdy ishinara qanaǵattandyrǵanymen, materıaldyq shyǵynymyzdy qanaǵattandyrmady. Onyń barlyǵyna chek kerek eken. Ózimiz azan-qazan bolyp jatqanda kim chek jınap júredi? Adam óliminiń ózi dálel emes pe? Bizdiń zańdarymyzdyń da qyzyq jeri kóp ekenine kóz jetti. Endi on bes kúnniń ishinde eki tarapqa da apelásıalyq sotqa berýge múmkindik bar», – deıdi ol.