QAZAQ AIR ushaǵy tarıhı reıs jasady: De-Havilland Dash 8-Q400 áýe kemesiniń ekıpajy tolyǵymen áıelderden turady, dep habarlady áýe kompanıasynyń baspasóz qyzmeti.
Komandır Ekaterına Sverchkova men ekinshi ushqysh Ajar Nesipbaevanyń basqarýymen laıner Astana – Petropavl – Astana jáne Astana – Omby – Astana baǵyttarynda ushty. Áýe kemesiniń komandıri, ekinshi ushqysh jáne eki bortserik, ıaǵnı ekıpajdyń barlyǵy tek áıelderden quralǵan.
Ekinshi ushqysh Ajar Nesipbaeva áleýmettik jelidegi paraqshasynda kabınada genderlik aıyrmashylyq joq dep jazdy.
"Komandır bar, ekinshi ushqysh bar. Árkim óz mindetin atqarady, óz jumysyn biledi. Keshe biz sondaı ádemi jáne qýanyshty kúıde jumys istedik. Aınalamyzdaǵylardy tańǵaldyryp, taǵy bir jumys kúnin kóterińki kóńilmen ótkizdik", - dep emosıasymen jáne ádemi sýretterimen bólisti.
QAZAQ AIR kompanıasyndaǵy birinshi áıel ushqysh Ekaterına Sverchkova áýe kompanıasyna 2018 jyly nebári 21 jasta kelgen. Onyń úlken tájirıbesi men biliktiligi bar. Ekaterına 16 jasynda alǵash ret óz betinshe ushqan.
"Avıasıaǵa degen súıispenshiligim parashútpen sekirý arqyly artty, men alty jyldy osy kásipke arnadym. Sol jerde men avıasıa jáne ushaqtardy jaqsy tanı bastadym. Men ózimdi jeke ushqysh retinde synap kórýdi jón kórdim de, azamattyq avıasıada bul mamandyqqa degen sezimim aldamaǵanyn túsindim", - deıdi ol.
Ekaterınanyń aıtýynsha, ol avıasıada eshqashan genderlik stereotıpterdi kezdestirmegen.
"Áriptesterime qatysty jolym boldy. Barlyǵy bir-birimen tatý. Men eshqashan ázil-qaljyń, kemsitý estigen emespin", - deıdi ushqysh.
Ol ushqyshtardyń jumys kestesi qıyn ekenin aıtty. Bos ýaqytynda ol tynyǵyp, uıyqtaıdy, ıogamen aınalysady jáne jazǵy keshterde jaǵalaýda serýendegendi unatady.
Pikir qaldyrý