Bodandyq qaı eldi ońdyrdy deısiz... Iá, bizdi de ońdyrmady. Dilimiz, dinimizdi umyttyq. Ata-dástúr alastatyldy.

            Artynsha táý etken táýelsizdigimiz keldi. Biraz dástúrlerimizdi qaıtardyq. «Men kimmin?» degen saýalǵa aýyz toltyryp jaýap aıta alatyn boldyq. Tamyrymyzdy tereńge jaıyp, handyǵymyzdyń 550 jyldyq mereıtoıyn toılatyp jatyrmyz. Qutty bolsyn!

            Biraq, áńgimeniń álqıssasy basqada. Bodandyqtyń bulty tarqady degende, bostandyqtyń da búlingen buryshy kórine bastady. Bizge batystyń bolmashy dástúrleri, áýeni, mentalıteti kire bastady. Ony jasyrý múmkin emes. Aıta-aıta aýyzdan dýa ketti. Biraq keıbir dúnıeni elemeı ótý essizdiń ǵana qolynan keledi. Máselen, til men dil máselesi...

            Dil demekshi. Taıaýda bir dosym syrymen bólisti.

            -..."Dosym habarlasty",- dep bastady ol áńgimesin, - negizi zaty qazaq, juma kúni habarlasyp tur. Keshkisin "demalaıyq" deıdi. Tahýa bolyp júrgenimiz shamaly, biraq jumada anamyz shelpek pisirgen shańyraqtan shyqqanymyz bar. Záre-qutym ushyp ketti. «Ne dep otyrsyń?»,-dedim. Búgin juma ekenin aıttym.

             Ol maǵan: "Erteń senbi ǵoı. Búgin pátnısa. Pátnısa-pıanısa emes pe?",- dep tańdana qarady.

            Apta aýyr bolǵanymen, din jaǵyn qozǵamasaq ta, jumada duǵa oqıtyn qazaq edik. Bul tegin dúnıe emes degen oı keldi. Urpaqty dilden, dinnen aıyrý - baryp turǵan ultqa degen qastandyq",- dep dosym áńgimesin aıaqtady .

            ...Mundaılardyń qolyn kesip, basyn julý kerek dep otyrǵanymyz joq. Biraq osy turǵyda memlekettik pen qatar ulttyq ıdeıanyń týyn qatar ustaý kerek sıaqty.  Maǵjan sengen, Qasym tańdana qaraǵan qazaq jastarynyń bul kórinisi júrekti qanjylatady. Qul bolsań tóbeńde, ul bolsań qolyńda oınaıdy dúr qamshy. Sap, ulttyń upaıyn túgendeıik.

Aıan Meırash

«Qamshy» portaly