«Halyq qaharmany» Aıdyn Aıymbetov týǵan jeri – Taldyqorǵanǵa kelip, jerlesterimen kezdesti. Jetisý halqy batyryn áýejaıdan kútip alyp, halyq qaharmanymen qaýyshý qýanyshy toı-dýmanǵa ulasty. Almaty oblysynyń ákimi Amandyq Batalov ólkemizdiń tóltýmasyn baýyryna qysyp, Jetisýǵa kelgen qadamyna qut tiledi. 

Kóńilin qýanysh, kókiregin maqtanysh kernegen Taldyqorǵan jurty oblys ákimi Amandyq Ǵabbasuly men Taldyqorǵan qalasynyń ákimi Ermek Alpysov bastaǵan saltanatty kerýenmen «Jastar» sport saraıyna taban tiredi. Munda da syrnaılatyp-kerneıletken Taldyqorǵan jurty batyr jerlesterin qarsy alyp turǵan edi. Bári de qýanyshty, bári de kóterińki kóńil kúıde. Qozy kósh jerdiń aýmaǵyn alyp turǵan saraı lyq toly. Qazaq eliniń abyroıyn asqaqtatyp, el maqtanyshy bolǵan Aıdyn Aıymbetovke syı-qoshemet kórsetken jerlesteri dúrkin-dúrkin batyrdy alqalaýmen otyrdy. Batyr uldy Jetisý jurtynyń atynan quttyqtap, halyqtyń yqylas-peıilin Almaty oblysynyń ákimi Amandyq Batalov jetkizdi. 
Ol «Qazaqtyń qaharman uldary – Toqtar Áýbákirov pen Talǵat Musabaevtyń izin jalǵaǵan Aıdyn Aıymbetovtiń erligi tarıhta qalady. Halyq qaharmany Baýyrjan Momyshuly «Órshil rýhtan ólmes erlik týady» degen eken. Rýhy bıik Aıdyndaı azamatymyz – qazaqtyń qaısar batyr uly, erkin dalanyń qyrany», – dep ǵaryshkerge ystyq yqylasyn bildirdi.
Osydan keıin sóz alǵan Taldyqorǵan qalasynyń ákimi Ermek Alpysov qala halqynyń atynan aspan kóginen aman-esen jerge oralǵan Erlikti eli kóterdiAıdyndy jeńisimen quttyqtaı kelip, batyr ulǵa «Taldyqorǵan qalasynyń qurmetti azamaty» ataǵy berilgenin habarlap, sý jańa avtokóliktiń kiltin tabystady. Al óz kezeginde Aıdyn Aıymbetov Taldyqorǵan qalasy týraly jyly lebizin bildire otyryp, Jetisý jurtshylyǵyna alǵys aıtty. Halyq qaharmany «Taldyqorǵan – eń ádemi qala. Men osyndaı qalada týǵanyma maqtanamyn. Syndarly sátte ystyq yqylastaryńyz ben rýhanı qoldaý bildirgen, jerlesterim, sizderge alǵysym sheksiz!», – dedi. Saltanatty quttyqtaý rásiminen keıin Jetisý óńiriniń ónerpazdary ǵaryshkerdiń qurmetine konserttik baǵdarlama usyndy. Patrıottyq rýhtaǵy án aıtylyp, áskerı áýen qalyqtady. 
Resmı jıyn aıaqtalysymen Aıdyn Aqanulyn úlken-kishi qaýmalap sýretke túsýge kezekke turyp jatty. Jýrnalıserge suhbat berýge áreń jetken ǵaryshker aspan áleminde júrgizgen zertteýi týraly jáne bolashaqtaǵy josparymen bólisti.

Aıdyn Aıymbetov, 
Halyq qaharmany, ǵaryshker:
– Aldaǵy josparym halyqaralyq ǵarysh jobasyn júzege asyrý. Jalpy, bizdiń eldiń ǵaryshtyq múmkindigi óte joǵary. Ol tek qana Erlikti eli kóterdiBaıqońyr ǵarysh aılaǵy bolýymen ǵana emes, bizde ǵarysh álemin zerttep júrgen bilikti jas mamandar kóp. Bizdi sol qýantady. Qazaq balasy ǵarysh álemin áli de baǵyndyra beredi dep senemin. Al bizdiń ǵaryshta júrgizgen zertteý jumysymyz tamaq, ónerkásibinde, termo ıadorly energetıkada, medısınada, nanotehnologıa ǵylymynda qoldanylady. 
«Jastar» sport saraıynan shyqqan soń, Aıdyn ózi oqyǵan №14 orta mektepke bardy. Onda oqýshylar men ustazdar, batyrdyń synyptastary, ustazdarymen kezdesti. Kóterińki kóńil kúımen qarsy alǵan mektep ujymy qonaǵyn partaǵa otyrǵyzyp, qyzyqty oıyn oınatty. Oqýshylar Aıdyn aǵalaryna arman-tilegin aıtty. Oqýshylar «Siz basqan jer, siz tynystaǵan aýa, siz otyrǵan parta bizge qýat beredi. Biz úshin qasterli mekenniń biri – siz oqyǵan osy mektep» – dedi. Mekteptiń zalynda balalar ónerin kórsetip, batyrǵa ózderi jasaǵan qolóner buıymyn tartý etti. Aıdyn Aqanuly óz sózinde oqýshylarǵa «jaqsy oqyp, bilimdi bolyńdar» – dedi. Sondaı-aq «Osyndaı kirshiksiz, ańǵal kúılerińde qalyńdar. Men sabaqty jaqsy oqydym. Biraq sondaı úlgili oqýshy bolǵan joqpyn, buzyqtyq jasap pedagogıkalyq keńeske de shaqyrylyp júrdim» dep balalyq shaǵyn esine aldy. Ǵaryshker mektepke óziniń ekıpajdaǵy seriktesterimen túsken fotosýretterin jáne «Qazǵaryshtyń» emblemasyn tabystady. Bul mektepte qazirgi kúni Aıdyn Aıymbetovke arnalyp murajaıdan bir burysh jasalǵan. Onda ǵaryshkerdiń sýretteri toptastyrylypty. Sondaı-aq osy bilim ordasyndaǵy tálimgerler batyrdyń qurmetine ǵalamnyń maketi sıaqty shaǵyn sáýlettik kompozısıa jasaǵan. Ol da murajaıdyń bir buryshynan oryn alypty. Oqýshylardyń ónerin tamashalaǵan soń ǵaryshker «Iman» meshitine baryp, duǵa oqyp, tilek tiledi. Odan keıin ǵana batyrymyz áskerı boryshyn ótegen №21751 áskerı bólimge baryp, jeke qurammen kezdesti. 

Derekkóz. Jas qazaq