Ýaqyt – toqtaýsyz ózen. Biraq adamzat tarıhynda sarqylmas máńgilik qundylyqtar bar. Olar – bilim, parasat, meıirim. Osy asyl qasıetterdi júregine tumar etken jan – ustaz. Al Qanıpa Omarǵalıqyzy – ustazdyń ustazy, bilimniń shamshyraǵy, rýhtyń qaıratkeri edi.

Men Qanıpa apaıdyń aldynda bar bolǵany eki jyl ǵana oqýshy boldym. Biraq sol eki jyl – meniń búkil ǵumyryma azyq bolǵan taǵylym mektebi. Han apamdy árdaıym máńgilik ustazym dep bilemin, onyń shákirti bolǵanymdy úlken maqtanysh sanaımyn.

Qanıpa Omarǵalıqyzy bizdi tek ádebıetke baýlyǵan joq, ómirdiń ózin úıretti. Ol bizge Abaıdyń ǵaqlıasyn, Maǵjannyń asqaq armanyn, Muqaǵalıdyń muńyn, Sherhannyń shynshyldyǵyn sanamyzǵa sińirdi. Onyń synybynda ár shákirt óz oıymen daralandy, pikirin ashyq aıtty. Qanıpa apaı bizge: “Shyndyqty qoryqpaı sóıle. Eshqashan jaltaqtama. Ádilettilik úshin kúrese bil!” – dep únemi qaıtalap otyratyn. Bul sózder men úshin ómirlik qaǵıdaǵa aınaldy.

Men ózimdi Qanıpa apaıdyń eń súıikti shákirtimin dep oılaıtynmyn. Biraq mektep bitirgen soń túsindim – ol árbir shákirtine osyndaı erekshe sezim syılaı bilgen eken. Onyń júregi teńdeı bólingen sheksiz mahabbatqa toly edi. Árqaısymyz ózin erekshe sezinip óstik, ómirlik azyq bolǵan ulaǵat aldyq. Biz – onyń balalary edik. Biz úshin qýanyp, biz úshin alańdaıtyn. Biz jetistikke jetsek, balasha shattanatyn, qatelik jasasaq, júregi aýyratyn.

Qanıpa apaıdyń eń basty qasıeti – óz isine degen adaldyǵy edi.

Onyń aqyl-keńesin alýǵa talaı mınıstrler men ákimder keletin. Al bizge: “Olarmen oılaryńdy búkpeı bólisińder, taısalmańdar!” – dep aqyl aıtatyn. Sol sebepti, búginde qandaı laýazymdy adamnyń aldynda bolsaq ta, óz oıymyzdy ashyq aıtyp, artyq jalbaqtamaımyz. Bul – tek maǵan ǵana emes, Qanıpa apaıdyń árbir shákirtine sińirgen asyl qasıetteriniń biri.

Qanıpa apaıdyń amanaty – adaldyqpen qyzmet etý, bilimniń shyraǵyn sóndirmeý, izgilik pen ulttyq rýhty bıik ustaý. Búginde qaı salada júrsek te, ustazymyzdan alǵan taǵylym – ómirimizdiń temirqazyǵy.

Uly ustazdyń meıirimi de, tárbıelik tásili de erekshe edi.

“Myna qulaqtan kún kórinedi!” – dep erkeletkende, anamnyń meıirimine bólengendeı kúı keshetinmin. Qazir balam Elhannyń qulaǵynan kún kóringende, Qanıpa Omarǵalıqyzynyń sol meıirimin saǵynyshpen eske alamyn…

Qanıpa Bitibaeva – tek bilimniń ǵana emes, qazaq rýhanıatynyń shamshyraǵy. Onyń artynda qalǵan eńbekteri, jazǵan kitaptary, zertteýleri – ultqa qyzmet etetin baǵa jetpes mura.

Qanıpa Omarǵalıqyzy – máńgilik ustaz. Onyń esimi, eńbegi, shákirtterine bergen shapaǵaty eshqashan umytylmaıdy. Ustazdyń aldynan ótken árbir túlek – bolashaqqa jol nusqaǵan shyraqshy. Eger biz sol shyraqty jaǵa bilsek, ustazymyzdyń eńbegi esh ketpegeni.

Ustazymnyń rýhyna taǵzym etip, máńgilik qurmetpen eske alamyn!

Aıtqazy Jomart Aıtqazyuly

Astana qalasy ákimi apparaty basshysynyń orynbasary