Áleýmettik jelilerde Qazaqstan aýyl sharýashylyǵy maqsatyndaǵy aýqymdy jerlerdi Qytaıǵa berýdi josparlap otyrǵany týraly aqparat taralýda. Habarlama avtorynyń aıtýynsha, bul másele boıynsha kelissózder 2009 jyldan beri júrgizilip keledi, al jalpy jerdiń aýdany 1,7 mıllıon gektarǵa jetti. Aqparattardyń skrınshotyn stopfake.kz mamandary jarıalady.
Qazaqstan Respýblıkasy Syrtqy ister mınıstrliginiń baspasóz qyzmeti bul aqparatqa qatysty túsinikteme berdi.
"Bul feık. BAQ nemese aqparattyq-kommýnıkasıalyq jelilerdi paıdalana otyryp, kórineý jalǵan aqparat taratqany úshin jaýapkershilik kózdelgenin eske salamyz. Tek resmı derekkózderge ǵana senińiz", – delingen QR SİM resmı habarlamasynda.
Qazaqstan Respýblıkasy Aýyl sharýashylyǵy mınıstrliginiń baspasóz qyzmetiniń habarlaýynsha, QR Jer týraly kodeksiniń 23-babyna sáıkes, aýyl sharýashylyǵy óndirisin júrgizýge jáne orman ósirýge arnalǵan jerdi qospaǵanda, jer ýchaskeleri sheteldikterdiń, azamattyǵy joq adamdardyń jáne sheteldik zańdy (memlekettik emes) tulǵalardyń jeke menshiginde bolýy múmkin.
"Bul óndiristik jáne óndiristik emes, onyń ishinde turǵyn úıler men olardyń keshenderin salý úshin berilgen nemese olar salynǵan jer ýchaskeleri bolýy múmkin. Bul rette Qazaqstan Respýblıkasy Memlekettik shekarasynyń shekaralyq beldeýinde ornalasqan jer ýchaskeleri jeke menshikke jáne ýaqytsha jer paıdalanýǵa berilmeıdi", – dep habarlaıdy vedomstvo.
Mınıstrliktiń málimetinshe, QR Jer kodeksiniń 24-babyna sáıkes, sheteldikter, azamattyǵy joq adamdar, sheteldik zańdy tulǵalar, sheteldik qatysýy bar Qazaqstan Respýblıkasynyń zańdy tulǵalary, halyqaralyq uıymdar, halyqaralyq qatysýy bar ǵylymı ortalyqtar, sondaı-aq qandastar aýyl sharýashylyǵy maqsatyndaǵy jer ýchaskelerin jeke menshik nemese jer paıdalaný quqyǵymen ıelene almaıdy.
"Kodekstiń 171-babyna sáıkes, sheteldikterge, azamattyǵy joq adamdarǵa, sheteldik zańdy tulǵalarǵa, sheteldik qatysýy bar Qazaqstan Respýblıkasynyń zańdy tulǵalaryna, halyqaralyq uıymdarǵa, halyqaralyq qatysýy bar ǵylymı ortalyqtarǵa, sondaı-aq qandastarǵa jaldaý sharttarymen 2016 jylǵy 1 shildege deıin berilgen aýyl sharýashylyǵy maqsatyndaǵy jer ýchaskelerine ýaqytsha jer paıdalaný quqyǵy jaldaý shartynyń qoldanylý merzimi aıaqtalǵanǵa deıin qoldanylady jáne jańa merzimge uzartylýǵa jatpaıdy nemese osy Kodekste kózdelgen ýaqytsha jer paıdalaný quqyǵyn toqtatý úshin ózge de negizder bastalǵanǵa deıin qoldanylady", – dep habarlady QR Aýyl sharýashylyǵy mınıstrligi.
