Qazaqstan SİM Taıaý Shyǵystaǵy jaǵdaıǵa baılanysty alańdaýshylyq bildirdi
Qazaqstan Respýblıkasynyń Syrtqy ister mınıstrligi Taıaý Shyǵystaǵy ahýaldyń ýshyǵýyna baılanysty resmı málimdeme jasady. Onda AQSH-tyń Iranǵa qarsy sońǵy áskerı áreketteriniń saldarynan halyqaralyq jaǵdaıdyń kúrt nasharlaǵany jáne bul Ortalyq Azıa óńirindegi memleketterdiń qaýipsizdigine tikeleı qater tóndiretini atap ótilgen.
"Qazaqstan Kaspıı mańy elderiniń qatarynda jáne Iranmen ártúrli salalarda tyǵyz yntymaqtastyq ornatqan. Bizdiń elimiz barlyq kelispeýshilikter, sonyń ishinde ıadrolyq máseleler tek BUU Jarǵysyna saı kelissózder arqyly sheshilýi tıis dep sanaıdy", – delingen SİM habarlamasynda.
Qazaqstan SİM barlyq múddeli taraptardy ıadrolyq qarýdyń taralýyna jol bermeý, sondaı-aq taratpaý rejımin saqtaıtyn memleketterdiń qaýipsizdigine halyqaralyq kepildikter berý maqsatynda jańa kelisimdi daıyndaýǵa shaqyrdy.
Eske sala keteıik, buǵan deıin AQSH Prezıdenti Donald Tramp Irannyń ıadrolyq nysandaryna soqqy jasalǵanyn málimdegen edi.
